Alcuinus, Epistolae, EPISTOLA CLXXVIII. AD AEDILBERTUM EPISCOPUM. Orationibus omnium et singulorum se commendat, hortatur ad patrum suorum sequenda vestigia, ad lectionem sanctae Scripturae, ad iuniorum instructionem.
| 1 | Praecipue dignitatis pastori Aedilberto episcopo et omni congregationi in ecclesia sancti Andreae Deo servientium, Alcuinus vestrae clientellus charitatis [Canis., sanctitati] in Christo salutem. |
| 2 | Specialis [Cod. Sal., spiritalis] amicitiae cupidus, vestrae sanctitati parvitatis meae litterulas dirigere curavi, ut et pactum antiquae familiaritatis innovarem, et me vestris sacratissimis commendarem orationibus. |
| 3 | Et si unius, iuxta Apostolum, multum valet deprecatio iusti (Iac. V, 16), quanto magis et totius sanctissimae congregationis in Christo, quorum quotidie canonicis horis pacificae unitatis [Cod. Sal. et Can., unanimitatis] postulationes coelum penetrare credendum est. |
| 4 | Etiam et singularis uniuscuiusque in secreto oratio ad aures omnipotentis Dei pervenire non dubitandum est [Cod. Sal., esset]. |
| 5 | Quapropter cum omni petitionis humilitate meipsum etiam unicuique, et communibus omnium et specialibus singulorum, quantum mea valet apud vestram pietatem deprecatio, commendo orationibus; ut per vestrae sanctitatis preces, meorum catenis peccatorum absolutus vobiscum, fratres charissimi, vitae ianuas ingredi merear. |
| 6 | O nobilissima sanctorum progenies Patrum! |
| 7 | illorum honoris venerabilisque vitae successores et pulcherrimorum habitatores locorum vestrorum sequimini vestigia Patrum, ut de his pulcherrimis habitationibus ad eorum, qui vos genuerunt, aeternae beatitudinis consortium, in coelestis regni pulchritudinem, Deo donante, pervenire mereamini. |
| 8 | Dei discite scire et implere praecepta, illo dicente: Si vis ad vitam ingredi, serva mandata (Matth. XIX, 17). |
| 9 | Ideo necessaria est sanctorum lectio librorum, quatenus in eis quisque intelligat [Al., inveniat], quid sequi, vel quid cavere debeat. |
| 10 | Maneat vero in vobis lumen scientiae, et per vos aliis luceat ecclesiis, ut vestra laus in ore resonet omnium, et vobis in coelis merces maneat aeterna. |
| 11 | Unusquisque proprii laboris mercedem accipiet. |
| 12 | Pueros adolescentesque diligenter librorum scientiam ad vitam [Al., in via] Dei docete, ut digni vestri honoris fiant successores, etiam et intercessores pro nobis. |
| 13 | Suffragia vero viventium prosunt morientibus vel ad veniam peccatorum, vel ad maioris gloriae augmentum. |
| 14 | Qui non seminat, non metet, et qui non discit, non docet. |
| 15 | Et talis locus sine doctoribus aut non, aut vix salvus fieri poterit. |
| 16 | Magna est eleemosyna pauperem cibo pascere corporali; sed maior est animum [Cod. Sal., animam] doctrina spiritali satiare esurientem. |
| 17 | Sicut pastor providus gregi suo optima providere pascua curat, ita doctor bonus suis subiectis perennia pascua vitae omni studio procurare debet. |
| 18 | Nam multiplicatio gregis, gloria est pastoris, et multitudo sapientium, sanitas est orbis (Sap. VI, 26). |
| 19 | Scio vos, sanctissimi Patres, haec optime scire et voluntarie implere. |
| 20 | Sed charitas dictantis ab ore rapuit verba, credens vos pia velle humilitate legere, quae sobria in Dei dilectione dictavi devotione. |
| 21 | Iterum iterumque obsecro ut mei nominis inter familiares vestros memoriam habere dignemini. |
| 22 | Almitatem vestram pro tota Dei intercedentem Ecclesia ipse Deus Christus exaudiat, vosque ad aeternae beatitudinis gloriam pervenire concedat, charissimi fratres. |