Alcuinus, Epistolae, EPISTOLA CLXXIII. AD IOSEPPUM. Condolet ob infirmitatem corporis, et excitat ad patientiam. Commendat se orationibus; hortatur ad renovationem domus Dei, etc.
| 1 | Dilecto filio Ioseppo, Albinus salutem. |
| 2 | Doleo de dolore corporis tui, sed gaudeo de felicitate animae tuae. |
| 3 | Quia flagellat Deus omnem filium quem recipit (Heb. XII, 6). |
| 4 | Occidit et vivificat; vulnerat et medetur (Iob. V, 18). |
| 5 | Spes praemii solatium tibi sit laboris. |
| 6 | Hi dolores cito finiuntur, praemia patientiae nunquam. |
| 7 | Non sunt condignae passiones huius temporis ad superventuram gloriam, quae revelabitur in sanctis (Rom. VIII, 18). |
| 8 | Quapropter cum gratiarum actione immola Deo sacrificium laudis (Psal. XLIX, 14). |
| 9 | Non est haec tribulatio poenalis, sed propitiatio venialis. |
| 10 | Aurum in fornace per ignem coquitur (Prov. XXVII, 21), ut purius exeat: sic anima corporali tribulatione, ut mundior procedat ad vitam. |
| 11 | Disciplina Domini non debet cuiquam esse disciplina; sed hilariter accipiat quod pius medicus salubriter immittit. |
| 12 | Inter flagella pietatis, orationes humilitatis ad Deum dirigantur, ut qui misericorditer castigat, clementer ignoscat, ut salus aeterna patienti proveniat. |
| 13 | Nostri quoque memor sedulas pro nobis fundere preces non cessa, quatenus divina nobis provideat clementia perpetuae conversationem prosperitatis. |
| 14 | Adhuc dubio stamine pacis sub tegmine causa texitur, et dum plenum perficitur vestimentum, mox ad induendum vestrae dirigetur fraternitati. |
| 15 | Valde placet quod domum Dei renovare coepisti: stude ut et istam perficias, et alteram, de qua praesens dixi. |
| 16 | facias consecrari: ut pro duplici Dei honoris labore multiplicem merearis accipere mercedem. |
| 17 | Vivas, vigeas et valeas feliciter, fili charissime! |