Alcuinus, Epistolae, EPISTOLA CLXXI. AD RIGBODUM ARCHIEPISCOPUM COGNOMENTO MACHARIUM. (Anno incerto.) Queritur de intermisso commercio litterarum. Ad horam expetit quaedam scripta sancti Leonis et Ven. Bedae. Ad sanctum Martinum invitat.
| 1 | Machario patriarchae Albinus salutem. |
| 2 | Quid proficiunt sapientia abscondita vel thesaurus invisus (Eccli. XX, 32), vel charitas muta? |
| 3 | Num ignis in silice, nisi excutiatur, flammifacit? |
| 4 | Quare tua, frater charissime, charitas taciturnitate obmutescit? |
| 5 | Cur non movebis linguam ad dictandum, manum ad scribendum? |
| 6 | Quid talentum humo obruis? |
| 7 | Quare admonitoria non currit chartula? |
| 8 | Legat quid desiderat; consideret quid faciat. |
| 9 | Timeo ne mus l cnse bacha litterae submersae sint: tamen si tua taceat mihi fistula, aliis obsecro resonet, ut excitentur dormientes, et sanentur languentes, et aures surdorum audiant, et claudi viam disciplinae currere certent, ut fiat merces [Ms., mirus] monstranti viam veritatis. |
| 10 | Scriptum est, qui audiat, dicat verum. |
| 11 | Vocatus fui, sed infirmitas praepedivit iter meum. |
| 12 | Vos loquimini quae Deo placeant, et ad sanam pertineant doctrinam. |
| 13 | Omeliam sancti Leonis, et Tractatum beati Bedae in Tobia deprecor ut ad horam praestes nobis. |
| 14 | Sed ut video porrectam habes manum ad accipiendum, et collectam ad dandum. |
| 15 | Iter vero quod restat viae nostrae, deprecor, sanctis orationibus vestris adiuvate, ut ad portam perpetuae civitatis pervenire merear. |
| 16 | Si veniens veneris, excipiet te dextera Dei Patris, et si iuvaverit [Forte, sic iuvabit] te intercessio sancti Martini. |
| 17 | Florentem te in omni bono, et proficientem in sancto sapientiae studio divina comitetur et provehat gratia, dilectissime frater! |