Alcuinus, Epistolae, EPISTOLA CLVI. AD ARNONEM. Mittit per Fredegisum varia opuscula, et illi hunc suum filium commendat.
| 1 | Venerando evangelistae Aquilae Albinus salutem. |
| 2 | Direxi dilectioni vestrae, per Fredegisum filium meum, manualem libellum multa continentem de diversis rebus, id est: Breves expositiones in psalmos septem poenitentiae, in psalmum quoque CXVIII, similiter et in psalmos XV Graduum. |
| 3 | Est quoque in eo libello Psalterium parvum, quod dicitur beati Bedae presbyteri Psalterium, quem ille collegit [Ms., collexit] per versus dulces in laude Dei, et orationibus per singulos psalmos iuxta Hebraicam veritatem. |
| 4 | Est quoque hymnus pulcherrimus de sex dierum Opere, et de sex Aetatibus mundi: Est et in eo epistola de Confessione, quam fecimus ad infantes et pueros: Est et in eo Hymnus vetus de XV psalmis Graduum. |
| 5 | Habet et alias orationes; et hymnum quoque nobilissimum elegiaco metro compositum de quadam regina Edildryde nomine; quem libellum posui in manus Fredegisi filii mei. |
| 6 | Tu quaere illum ab eo; ne forte in oblivione habeat propter alias occupationes tibi eum reddere, et nullatenus permittas, nisi habeas illum ob memoriam nostri, sive in domo [Cod., domu], sive in itinere, ut audias illum quasi me tibi loquentem in cor. |
| 7 | Plura misissem in eum, nisi festinatio eius praeveniret me, et non habebam tempus eum ordinare sicut dispositum habui. |
| 8 | Valeto prospere, et feliciter legens illum, meique memor in orationibus semper sine fine vale. |
| 9 | Obsecro clementissimam benignitatem vestram, o dilectissime Aquila, ut filium meum Fredegisum benigne suscipiatis et familiariter, eumque adiuvetis secundum possibilitatem vestram, habeatisque illum fratrem in Christo, qui vos conservet in aeternum. |