Alcuinus, Epistolae, EPISTOLA CLV. AD ARNONEM ARCHIEPISCOPUM (Anno 803.) Commendat se tanquam infirmum senem sacrae memoriae. Duo vascula mensalia mittit; et iteratas pro casula missali gratias agit.
| 1 | Dilectissimo filio Aquilae archisacerdoti Albinus in Domino salutem. |
| 2 | Solet charitas olim germanitate fideli compacta novis saepius litteris reformari, ut firma agnoscatur in fide, quae est dulcis in consuetudine. |
| 3 | Unde ego chartulam chartulae coniungo, ut legatur in pagina, quae est in cordis tabulis [Mabill., tabula] conscripta, non atramento perituro, sed spiritu sempiterno, qui gemitus excitat inenarrabiles pro sospitate vestra in meo corde. |
| 4 | Vestra vero dilectio, ut certissime novi, nostri nominis non obliviscatur: quia crebra infirmitas cogit nos amicos admonere de sanctarum orationum suffragio, ut propitietur peccatis meis pietas divina, et renovetur vita mea in melius, sicut aquilae iuventus (Psal. CII, 5): Nec me iudex meus et testis meus iudicet secundum merita mea, sed secundum suam magnam misericordiam parcat confitenti sibi servulo se esse peccatorem: nec derelinquat eum in diebus senectutis suae (Psal. LXX, 9); sed solatio sancti Spiritus foveat eum, et misereatur illi. |
| 5 | Haec eadem verba vestra recordetur de seipsa sanctissima mens et acutissima prudentia: in qua dum tempus habeas (Gal. VI, 10), labora opus Dei, ut in die magno Domini nostri mercedem laboris tui sortiaris cum sanctis Dei sempiternam. |
| 6 | Divina vos vestrosque filios vestramque familiam gratia sempiterna protectione custodiat, praeveniat, donis augeat et meritis in aeternum. |
| 7 | [Duo vascula direxi vestrae charitati, Pater sancte, quae deprecor ut humiliter accipias habeasque aliquantum temporis ante oculos tuos in mensa, veluti ego casulam in missarum solemniis habiturus sum.] |