Alcuinus, Epistolae, EPISTOLA CXXXVII. AD CHRODGARIUM COMITEM. (Anno 801.) Infantulum et fratrem erudiendos se suscipere significat. Hortatur ad fidele servitium, et consilia regi praestanda. Cavere sibi, ad vastandam urbem Beneventanam abituro, suadet a noxio Italiae aere.
| 1 | Viro laudabili Chrodgario comiti Albinus diaconus salutem. |
| 2 | Litterarum legatio non est spernenda, ubi linguae officium ob amicitiam coniungendam longinquitas terrarum abstulit. |
| 3 | Unde ego tibi, venerande amice, hos apices meae devotionis dirigere curavi, obsecrans ut fideli charitate orationes meas inter spiritales amicos tuos, quocunque perrexeris, commendare studeas. |
| 4 | Bonum infantulum nobis ad erudiendum direxistis, etiam cum fratre valde laudabili, cuius mores nobis optime conveniunt, in omni religione et sanctitate; et necessarium est infantulo, quem velim, ut citius remittas ad nos. |
| 5 | Nec tibi, deprecor, onerosum esse litterarum admonitio ( Ita cod. ms.) mearum, quoniam opto te in Dei voluntate proficere, et salutem operari animae tuae in eleemosynis ad pauperes, et iustitia ad omnes, et misericordia ad miseros et consiliis bonis, quae domno imperatori et regno Francorum proficiant ad salutem et prosperitatem. |
| 6 | Audivi, vos ituros esse ad vastandam Beneventanam patriam. |
| 7 | Scis optime quale periculum ibi imminet tibi, propter pestilentem illius terrae aerem. |
| 8 | Ideo nihil dimittas inconsideratum rerum tuarum; maxime ne ulla retro super te clamet iniustitia, vel cuiuslibet culpae negligentia. |
| 9 | Utere sapientia tua ad salutem tibi sempiternam, quia illa tantummodo vera est scientia, quae perpetuam hominibus praestat beatitudinem. |
| 10 | Opto te feliciter vivere in haec tempora atque in futura, venerande amice! |