Alcuinus, Epistolae, EPISTOLA CXXVII. AD DILECTISSIMAM SOROREM. Pro cappa et aliis donis gratias agit; Angilberti, Avae sororis, et Columbae meminit.
| 1 | Dilectissimae in Christo sorori. |
| 2 | Prospera, donante deo, his sanctissimis diebus habuimus solemnia, et laetus fuit domnus rex, et omne palatium in gaudio. |
| 3 | Et ego, frater vester, magnum habui gaudium de prosperitate et salutatione vestra, de gratissimo munere Psalmodiae et Missarum celebrationis, quod mihi magna charitate direxistis. |
| 4 | Sed et cappa quam mihi aptissimam misistis, valde animo meo placet. |
| 5 | Veniente vero Angelberto forte aliquid certius vobis remandare habemus. |
| 6 | Vos animum vestrum firmate in servitio Dei et in salute animae vestrae. |
| 7 | Viriliter domum aedificate vobis sempiternam in coelis, ut paratam habeatis beatitudinem cum Christo et sanctis eius, quam plurimi verbis optant, sed rebus non perficiunt. |
| 8 | Tu vero labora diebus, horis ac momentis, ut abundanter habeas quod feliciter diligas. |
| 9 | Credo te de orationibus Avae [Al., Evae] sororis nostrae fideliter facere. |
| 10 | Sed ex mea petitione aliquid superadde, quia mihi fidelis fuit. |
| 11 | Et ubi plus fides innotescit, quam post mortem amici? |
| 12 | Dic Columbae, ut memoriae confirmet quod accepit, donec veniat qui superadiiciat. |
| 13 | Beati qui esuriunt et sitiunt iustitiam, quoniam ipsi saturabuntur (Matth. V, 6). |
| 14 | Desiderium vestrum impleat, et cor charitate illuminet, qui venit mundum illuminare, et ignorantiae tenebras de cordibus in eum expellere credentium. |
| 15 | Vita et salus, Christo donante, vos comitetur in aevum. |