Alcuinus, Epistolae, EPISTOLA CXXVI. AD SOROREM CHARISSIMAM. (Anno 801.) Laudat illius pietatem, et ad laborem pro aeternitate exhortatur: gratias agit pro cruce donata.
| 1 | Charissimae in Christo sorori. |
| 2 | Vere fateor quod valde desideravi ad vos venire propter aliquas necessitates, quas vobiscum conferre volui. |
| 3 | Sed me impedivit acerbitas febrium, quae me adhuc per vices fatigat. |
| 4 | Quapropter citius ante hibernale frigus regi obviam properare curabo. |
| 5 | Placet mihi valde labor vester in sanctae Dei Genitricis Ecclesiae exaltatione, et in librorum consideratione. |
| 6 | Unde in his laboribus, quantum poterimus, vestram solertiam adiuvare gaudemus. |
| 7 | Et puer Fridegisus secundum temporis opportunitatem vobis ferat auxilium. |
| 8 | Vester vero profectus in Deo mei animi est magna voluptas. |
| 9 | Ideo quod coepisti perficere, Dei adiuvante misericordia, diligentissime studeas. |
| 10 | Unusquisque secundum suum laborem praemium accepturus erit. |
| 11 | Et qui plus laborat, plus mercedis accipiet. |
| 12 | Nunc tempus est operandi: veniet vero tempus remunerandi. |
| 13 | Quales tunc esse optemus, tales nosmetipsos nunc praeparemus. |
| 14 | Sapienti pauca sufficiunt. |
| 15 | Scio sagacitatem animi vestri haec omnia melius intellexisse quam me scripsisse; et operibus implere quod vix verbis explicare valeo. |
| 16 | Utinam cito adveniat tempus, ut tecum cordis mei conferam angustias, ut consoletur animus meus ex vestrae pietatis consolatione [Al., perfectione]. |
| 17 | Plurimum mihi placet crux quam vestra mihi benignitas direxit. |
| 18 | Et credo vos aeternam habere a Deo mercedem pro illius opere, et assiduas sancti Lupi intercessiones, et laudabiles gratiarum actiones ab eis qui ad illius patrocinia confugere solent. |
| 19 | Nunc soror alma vale, soror o charissima nobis!
|
| 20 | Et nunc et semper, dulcis amica, vale.
|