Alcuinus, Epistolae, EPISTOLA CIII. AD ARNONEM. (Anno 800.) Ex litteris ab Arnone acceptis illius reditum; nihil vero de novi populi Christianitate, nihil de ipsius commoratione, nihil de spe mutui colloquii, quod tamen valde exoptat, percipit.
| 1 | Sanctissimo pontifici et dulcissimo filio Aquilae Albinus salutem. |
| 2 | Suavissimas dilectionis vestrae accepi litteras, et laetus de agnitione prosperitatis et reversionis vestrae legebam eas; exspectans quid illae mihi nuntiarent de novelli populi Christianitate, et de rerum ibi gestarum profectu. |
| 3 | Sed nihil de his inveni. |
| 4 | Tamen, volente Deo, visurus vos, vel necessitate coactus habes [Pez., habebis] dicere, quod chartula conticuit [Pez., continet]. |
| 5 | Item quaerens in illis, quanto tempore beatitudini tuae in his partibus esset manendum? |
| 6 | Sed neque hoc inveni. |
| 7 | Ideo incertior de colloquio nostro factus, quid demandarem? |
| 8 | Tamen si usque ad Pascha liceat tibi in monasterio (Elnonensi S. Amandi ut infra) permanere, forsitan intra Quadragesimam visitemus te in lectulo deliciarum [tuarum] sedentem. |
| 9 | Ego vero ignarus adhuc sum de itinere meo [Pez., detinere me] propter famam, quae volitat per ora multorum, regem orationis gratia sancti Martini visitare patrocinia, et mihi necessitas incumbit, illum spectare [F., exspectare?], hospitiumque praeparare domino meo dilectissimo. |
| 10 | Et utinam volasset Aquila inter caeteros sanctarum volucrum coetus [usque] ad piscationes Ligeri fluminis! |
| 11 | Mandavit mihi quoque domnus rex venire ad Gyslae, sanctissimae sororis suae coenobium [Cod. Sal., Gysla. . . . . sorori . . . . ad coenobium] Gale [Cod. Sal., Cale] obviam Angilberto; sed ignoro adhuc quando [Pez., quomodo] hoc fieri debeat. |
| 12 | Si ante regis [adventum hoc erit] condictum, tunc venies nobis obviam ad Coisacam sancti Stephani cellam et [Pez., vel] ad [Noviantum Curtulum] nostrum. |
| 13 | Sed festina rescribere mihi, quantum fieri potest [Cod. Sal., posses], tempus mansionis tuae apud sanctum Amandum, et quid Leidrado [Cod. Sal., Laidrado] demandare velis. |
| 14 | Vix vivit, si facies nostras non videbit pariter. |
| 15 | Fuit enim toto anno infirmus valde, et dissoluta anima sua [Cod. Sal., animae suae] consiliare nobiscum cupit. |
| 16 | Multa bona, gloria Deo! |
| 17 | habet in illis partibus facta. |
| 18 | Dubitat vero an melius sit laborare in praedicationis ministerio, vel quietam ducere vitam? |
| 19 | Sed certius ab illo ipso, permittente Deo, haec audituri erimus. |
| 20 | Mandavi per litteras etiam, et saepius viva voce, fratribus sancti Servazii [Cod. Sal., Servasii] tuae servire auctoritati, sicut et mihi. |
| 21 | Plura tibi scriberem de sancta praedicationis instantia, et de honestate morum inter paganos; quia conversationis dignitas solet eos erudire in praedicatoribus [Al., praedicationibus], sicut verborum veritas. |
| 22 | Sed quia spero cito vos, miserante Deo, videre, melius haec colloquendo putavi conferre, quam scribendo innotescere. |
| 23 | Nec maiorem ardorem habet animus vester, quam meus colloquii nostri. |
| 24 | Ideo rogemus Dei clementiam, ut concedat nobis in sua misericordia, et in nostra prosperitate videre nos cito facie ad faciem. |
| 25 | Gratia Domini nostri Iesu Christi te in omni bonitate proficere faciat, fili charissime ( Cod. Mab., reverentissime pater)! [Amen.] |