| 1 | Domino desiderantissimo David regi Flaccus matricularius, aeternam in Christo salutem. |
| 2 | Dulcedo dilectionis vestrae, et fiducia probatae pietatis, saepius me hortatur vestrae auctoritati dirigere litterulas, officioque syllabarum indagare, quod fragilitas corporis obstat voluntati implere posse. |
| 3 | Sed rerum novitas supervenientium, novos iterum cogit edere apices, ut chartula ferat cordis affectum, et fundat preces ad aures pietatis vestrae: quae nunquam, ut vere fateor, cassatae in conspectu misericordiae vestrae fuerunt. |
| 4 | Nec meas pro vestra stabilitate et salute cassatas in conspectu Dei credo, quia libenter divina suscipit gratia lacrymas quae ex charitatis fonte profluunt. |
| 5 | Dictum est mihi, aliquos ex amicis Flacci tui, Edelardum scilicet, Doroensis Ecclesiae metropolitanum, et primae sedis in Britannia pontificem, vestram adire velle pietatem: ministrum quoque olim Offanae regis Ceilmundum de regno Mercionum [F., Merciorum]: sed et Torhcmundum Hedilredi regis fidelem famulum, virum in fide probatum, strenuum in armis: qui fortiter sanguinem domini sui vindicavit. |
| 6 | Hi omnes mihi valde fuerunt fideles, et adiutores itineris mei, vel meorum defensores puerorum, huc illucque discurrentium. |
| 7 | De quibus optimam vestram deprecor clementiam, solita benignitate suscipere eos, quia mihi necessarii fuerunt unusquisque in loco suo. |
| 8 | Saepius cognovi sacerdotes religiosos, et in Christi servitio devotos; nec non viros fortes, et fideles in saeculari dignitate, vestrae laudabiles esse aequitati. |
| 9 | Nam optimus quisquis, et in sua sibi ipsi probatus conscientia, bonos diligere non dubium est, edoctus omnipotentis Dei exemplo, qui summum est bonum. |
| 10 | Et omnis rationabilis creatura, quantum boni habet, eius bonitate illuminata habere certissimum est. |
| 11 | Ipsa Veritate dicente: Ego sum lux mundi. |
| 12 | Qui sequitur me, non ambulat in tenebris, sed habebit lumen vitae (Ioan. VIII, 12). |
| 13 | Perpetuam Christi tribuat tibi gratia lucem, Cum sanctis pariter, David amate Deo. |