Alcuinus, Epistolae, EPISTOLA LXVI. AD ARNONEM. (Anno 797, mense Augusto.) Gaudet de nuntio adventus illius; multa nosse ab illo desiderat; et de sua commoratione illum instruit.
| 1 | Dilectissimo patri Aquilae Transalpino Albinus magister salutem. |
| 2 | Gaudeo quod vel aliquam famam de vestro adventu audivi, multum cupiens vestrae beatitudinis faciem videre et optatam audire loquelam, simul et de prosperitate domni apostolici agnoscere, et quid in illis partibus gestum sit, et quomodo legatio vestra vobis evenisset, et si Sancti Pauli causa ad profectum fieri possit. |
| 3 | Haec omnia per velocem nuntium mihi demandare curam, obsecro, habeas. |
| 4 | Secundum quod iter meum dispositum habeo, volente Deo, die sabbati proximo, id est, Nonas Augustas, ad monasterium sancti Amandi habemus dispositum venire, et ibi die Dominica stare, et tunc ad Baralla [Pez. Barallam] villam nostram quatuor aut quinque dies remanere, non longe a Sancto Amando, sed quasi quinto decimo milliario; et sic ad Causiaco pervenire, et ibi hebdomada stare; et sic ad Sanctum Lupum. |
| 5 | Inter haec loca, Deo propitio, habes me totum Augustum, et aliquam partem Septembrii mensis, si ullatenus possis impetrare, ut fiat nostrum colloquium. |
| 6 | Interim, dum in proximo erimus, remanda mihi et quantos dies debeam te exspectare, quia non habeo in istis partibus aliquid ubi exspectare possum, propter inopiam rerum; quia quidquid fuit ibi, anno praeterito omnia amici nostri consumpserunt, bene facientes, et familiariter utentes rebus nostris. |
| 7 | Et quam citius possint litterae vestrae ad nos venire, festinanter legatus currat ut nos in proximo reperiat. |
| 8 | Si rex vos iubeat in palatio stare, non contradicit tibi Liutgardis et infantes ut ad nos venias, quia illae iturae sunt ad Niviella, uti ibi missam [sanctae Mariae] agant. |
| 9 | Veni, veni festinanter, si Deo placeat et sancto Martino et sancto Amando, ut nos videamus. |
| 10 | Nullatenus voluissem longius ire, antequam tuae beatitudinis faciem viderem. |
| 11 | Manda vero per nostras curtes; quidquid ibi erit, omnia tibi parata erunt. |
| 12 | Multum gaudeo de vestro colloquio; quia nescio quando erit, si nunc non erit. |
| 13 | Feliciter lege, et prospere veni, Pater optime et amice fidelissime, et in Christo charissime. |