Alcuinus, Epistolae, EPISTOLA LVII. AETHELREDO EPISCOPO, NE GREGEM DESERAT. (Anno 796.) Consolatur in persecutione ac tribulatione; et ad virilem perseverantiam, ne ab ovibus fugiat, hortatur.
| 1 | Acceptis litteris tuis, frater sancte! |
| 2 | laetus de salute tua, sed tristis de tribulatione et persecutionibus, quas te pati a gente tua in illis tuis apicibus agnovi. |
| 3 | Attamen beatos esse, Domino dicente, legimus, qui persecutionem patiuntur propter iustitiam, quoniam ipsorum est regnum coelorum (Matth. V, 10). |
| 4 | Quapropter suadeo tibi, frater venerande! |
| 5 | ut viriliter in fide integra et devotione infatigabili, pro commissis tibi a Christo ovibus certare non cesses, ne mercenarius fugiens, et non pastor firmus ab ipso Domino et pastore omnium deputeris (Ioan. X). |
| 6 | Aspice in eum, qui pro ovibus suis animam suam posuit (Ioan. X, 11), qui omnibus generaliter praecipiens dixit: Qui vult venire post me, abneget semetipsum, et tollat crucem suam et sequatur me (Luc. IX, 23). |
| 7 | Cui gregem Christi abiturus relinquis? |
| 8 | Nec haec dico quasi me excusando ad benefaciendum servis Dei, sed magis te adhortando, ut bona, quae incepisti facere, ad finem aeternae salutis perducas. |
| 9 | Qui perseveraverit usque in finem, hic salvus erit (Matth. X, 22). |
| 10 | Idcirco scripsi ad Offanum regem ut te adiuvaret, et defenderet sanctam Ecclesiam secundum suam possibilitatem [Al., potestatem]: quatenus tibi liceat Deo servire, et talentum tuum multiplicare in loco, ubi accepisti eum; et mercedem exspectare perpetuae beatitudinis, dicente Domino tuo: Euge serve bone et fidelis (Matth. XXV, 21). |