Alcuinus, Epistolae, EPISTOLA LV. AD QUEMDAM. (Anno 796, mense Augusto.) Rogat ut ecclesiam, dum novus episcopus eligendus est, ab omni violentia defendat, diesque aeternos in mente habeat.
| 1 | Domino omnium dilectissimo aeternam in Christo salutem. |
| 2 | Audiens ab Eanbaldo famulo vestro optatae prosperitatis vestrae sospitatem, valde me gavisum fateor; quia charitas et fides quae olim in pectore nostro habitare coepit, nunquam recedere poterit. |
| 3 | Et quanto plus tempus remunerationis appropinquat, tanto magis observare debebit: ut qui prius transierit a saeculo, amicum sibi sentiat reliquisse in saeculo. |
| 4 | Me vero filium tuum febrium acerbitas et regis tardatio in Saxonia retinuit, ut ad vos venire non potuerim, sicut desideravi. |
| 5 | Concedat mihi clementia divina faciem tuam in laetitia videre, antequam moriar. |
| 6 | Opto et obsecro, ut in ea te honoris dignitate, si fieri possit, inveniam, in qua te pergens videbam. |
| 7 | Tamen, si aliud aliquid tuo placeat animo, rogo ut nullam violentiam super ecclesiam Christi fieri ullatenus permittas; sed fratres libera electione in timore Dei summi, optimum Deo donante eligant. |
| 8 | Quia in sanctis canonibus terribile anathema legitur super omnes, qui violentiam aliquam inferunt super ecclesiam Christi. |
| 9 | Scito te semper dilexisse familiam nostram, et plurima illis bona fecisse. |
| 10 | Sed nunc maxime indigemus, ut bene illis agamus; ut ubi nobis requies erit aeterna, ibi sint quoque intercessores perpetui pro nobis. |
| 11 | Tempus est nunc nobis praevidere dies aeternos, et cum omni modestia et integritate, et eleemosynarum largitate, viam nobis praeparare ad coelos. |
| 12 | Omnis gloria transitoria est et quasi umbra recedet (Iob. VIII, 8, 9). |
| 13 | Ideo ad aeternam bonis operibus properemus gloriam. |
| 14 | Omnes saeculi vitemus vanitates, ut ad beatitudines coelestes pervenire mereamur. |
| 15 | Dies huius vitae, qui nobis restare videntur, vivamus Deo, ut post hanc illius consequamur misericordiam. |
| 16 | Divina tibi clementia huius vitae dies felices concedat, et aeternam cum sanctis suis tribuere gloriam dignetur, domine pater dilectissime. |