Alcuinus, Epistolae, EPISTOLA XLVI. AD DAMOETAM. Gratias agit pro dono; hortatur ad iustitiam cuique faciendam; atque amici suspirat adventum.
| 1 | Flavio Damoetae viro clarissimo plurimam Albinus perpetuae pacis salutem. |
| 2 | De vestra valde gaudeo prosperitate, et de munere charitatis vestrae multum gavisus sum, tot agens gratias quot dentes in dono numeravi. |
| 3 | Mirum animal, duo habens capita et dentes LX, non elephantinae magnitudinis, sed eburneae pulchritudinis. |
| 4 | Nec ego huius bestiae territus horrore, sed delectatus aspectu. |
| 5 | Nec me frendentibus illa morderet dentibus timui, sed blanda adulatione capitis mei placare capillos adrisi. |
| 6 | Nec ferocitatem in dentibus intellexi, sed charitatem in mittente dilexi, quam semper fideliter in illo probavi. |
| 7 | Sed quantum gaudeo in amoris dulcedine, tantum doleo in absentiae longinquitate. |
| 8 | Noluissem tanto tempore ab invicem separari, quos eiusdem charitatis dulcissima colligant vincula. |
| 9 | Quid faciam, nisi lacrymis sequar amicum, donc reveniat, quem animus optat habere praesentem. |
| 10 | O fili charissime! |
| 11 | inter occupationes saeculi non obliviscare tui; sed dum corpus epulis pascitur, anima eleemosynis reficiatur. |
| 12 | Et dum fatigata ex itinere membra quiete refocillantur, mens in Deo orationibus roboretur: et in diversarum auditu causarum iustitia semper resonet in ore, et ex intimo cordis affectu miserorum procedat [Al., proveniat] consolatio, et spes aequitatis non fallat advenientes, nec pietatis desint suffragia confugientibus ad vos, quia pietas in pauperes gesta aeterna remuneratur beatitudine. |
| 13 | Haec, fili mi, faciens floreas in omni virtutum decore, et te, quocunque vadas, divina comitetur protectio, euntemque ubique deducat prospere, ac redeuntem cum omni prosperitate citius reducat ad nos, ut gaudeat amor patris in filio, et laudetur Deus ubique, qui suos famulos sibimet invicem praesentabit ovantes. |
| 14 | Vigeas, valeas, et floreas, dulcissime Damoeta. |