Alcuinus, Epistolae, EPISTOLA XLI. AD PAULINUM PATRIARCHAM. (Forte anno 796.) Sui memorem esse rogat in S. missa. S. crucis, et alias reliquias sibi mitti petit; hortatur ad laborem praedicationis.
| 1 | Paulino sanctissimo patriarchae humilis levita Alcuinus salutem. |
| 2 | Absentia corporis non oportet dilectionem dividere, quia amicitia quae deseri potest nunquam vera fuit. |
| 3 | Ex quo te sciebam, dulcissime amice, semper amabam, et pepigit cor meum foedus amicitiae cordi tuo. |
| 4 | Et sic nomen Paulini mei, non in cera, quae deleri potest, scripsi. |
| 5 | Ne, quaeso, obliviscaris in tuis sanctis orationibus nomen amici tui Albini: sed in aliquo memoriae gazophylacio reconde illud, et profer eo tempore opportuno, quo panem et vinum in substantiam corporis et sanguinis Christi consecraveris. |
| 6 | Diu dilectionis tuae exspectavi promissa, hoc est, vivificae crucis, vel aliarum reliquiarum patrocinia. |
| 7 | Noli me, obsecro, tanto fraudare munere; nec te veritatis . . . . . Nolo longinquitatem viae causeris. |
| 8 | Charitas pennas ad volandum inveniet, nec flumina obruent illam (Cant. VIII, 7). |
| 9 | Sufficiunt alae fidei in palatio regis, quibus nec voluntas deest in accipiendo, nec fides in reddendo. |
| 10 | Si quid nostra petitio apud vos valeat, et tua semper ad Deum valeat petitio, qui te in tam sublimi statuit gradu, ubi eiusdem Dei Domini nostri Iesu Christi effectus . . . . . Vide quam sublime est hoc nomen. |
| 11 | Contende meritis esse quod nomine vocaris. |
| 12 | Clama, ne cesses, exalta quasi tuba vocem tuam (Isa. LVIII, 1). |
| 13 | Sit guttur tuum tuba Dei. Praedica importune, opportune (II Tim. IV, 2). |
| 14 | Tu gallus in praedicatione, succinctus in castitate. |
| 15 | Tu aries in veritate fortissimus, cui nullus regum resistere poterit (Prov. XXX, 30, 31). |
| 16 | Tu lucerna super candelabrum in domo Dei (Matth. V, 15). |
| 17 | Tua lingua coelum claudit et aperit (Apoc. III, 7). |
| 18 | Aperit primum per praedicationis devotionem. |
| 19 | Ad exemplum Christi recurre, qui per civitates, castella, vicos, villas, evangelizando iter agebat (Matth. IX, 35): etiam et domos publicanorum vel peccatorum, propter occasionem praedicationis, non abhorruit intrare (Luc. V, 29). |
| 20 | Spes praemii solatium sit laboris. |
| 21 | Quid facio insipiens ego contra philosophicum proverbium, ligna in silvam ferens, stillicidiis flumina irrigans? |
| 22 | Modulum meum extuli figurae. |
| 23 | Obsecro per eius amorem, qui duo minuta viduae donis divitum praeferebat (Marc. XII, 42, 43). |
| 24 | Charitas omnia suffert, in qua qui manet, in Deo manet (I Cor. XIII, 7), quia Deus charitas est (I Ioan. IV, 16). |