| 1 | Nobilissimo nobisque amantissimo filio Pippino Albinus, in Christi dilectione salutem. |
| 2 | Gratias agimus benevolentiae tuae, simul et pietati domni regis, qui pie consentit petitioni redemptionis captivorum. |
| 3 | Scio vos in talibus pietatis operibus promereri benedictionem, et longaevam regni prosperitatem adipisci. |
| 4 | Et tu, excellentissime iuvenis, nobilitatem generationis morum nobilitate adornare studeas; et Dei omnipotentis voluntatem, atque honorem tota virtute implere contende, quatenus illius inaestimabilis pietas solium regni tui exaltet, et terminos dilatet, et gentes tuae subiiciat potestati. |
| 5 | Esto largus in miseris, pius in peregrinis, devotus in servitio Christi: Servos illos [F., illis] et Ecclesias honorifice tractans, et ut sedula illorum oratio te adiuvet. |
| 6 | Esto honestus in conversatione, castus in corpore. |
| 7 | Laetare cum muliere adolescentiae tuae, et non sint alienae participes tui, ut benedictio tibi a Deo data in longam nepotum procedat posteritatem. |
| 8 | Esto fortis in adversarios, fidelis in amicos, humilis Christianis, terribilis paganis, affabilis miseris, providus in consiliis. |
| 9 | Utere consilio senum et servitio iuvenum. |
| 10 | Et aequitatis iudicia in regno tuo, et laus Dei ubique horis competentibus resonet; et maxime in praesentia pietatis tuae. |
| 11 | Quia huiusmodi devotio in officiis ecclesiasticis Deo te amabilem faciet, et hominibus honorabilem efficiet. |
| 12 | Sint tibi sobrietatis cogitationes in corde, veritatis verba in ore, honestatis exempla in moribus; ut te divina ubique clementia exaltet et custodiat. |
| 13 | Haec, obsecro, charta tecum in testimonium amoris mei pergat. |
| 14 | Etsi non sit digna tuae venerationis cingulo suspendi, tamen eius admonitio digna sit in corde tuae sapientiae recondi. |
| 15 | Vive Deo florens, laeta gaudensque salute. |
| 16 | Dextera te Christi protegat atque regat. |
| 17 | Obsecro, commendes Albini ut nomen ubique, O fili, famulis, per tua regna, Dei. |