Alcuinus, Epistolae, EPISTOLA XXXIV. AD ARNONEM. (Anno 796. Illius reditum exoptat, et de variis eventibus instrui cupit. Mense Iulio se ad Palatium iturum significat. Hortatur ut ab errore Hispanorum caveat.
| 1 | Venerando volucri et vere amantissimo Aquilae Albinus salutem. |
| 2 | Exspectans exspecto laetum audire nuntium, quomodo Aquila sublime volans Alpina iuga transcendat, et fessus volatu in Rhetiae [Cod. Sal., Reciae] partibus alas componat suas, vel quid mihi nuntiet de sancto [Paule] partibus, et Romanorum consiliis, et si fieri possit, quod valde optamus, Deo donante, ut fiat. |
| 3 | Quapropter precor omnes aligeras potestates de coelesti sede descendentes, ut Aquilam meum [Cod. Sal., meam] cito sanum cum omni prosperitate faciat venire ad nos. |
| 4 | Nos vero velut aestiva hirundo ad palatium mense Iulio properamus [Mabill., partibus palatinis properare desideramus]. |
| 5 | Nescio de nostro itinere quid erit futurum [sive circa Mosanas ripas liceat nobis sicut mergulos pisces captare; an Aligerensem fluvium revertere, et ibi Salmones natando colligere]. |
| 6 | Tamen me spero usque ad [Augustum mensem] in his morari partibus, si sic Deo nostro et domno regi placuerit, et ibi praestolare quid auditurus sim de Aquilae desiderato adventu. |
| 7 | Et dum hanc perlegas chartulam, cito remitte alteram, ut sciam quid acturus sit Aquila cum aviculis suis, vel quid [Avaria] faciat, vel credat, vel quid Romanorum nobilitas novi habeat adventu, vel quid de Graeciae sublimitatibus [Cod. Sal., Graecia solimitatibus] audieras, et an aliquas sanctorum reliquias tecum attulisses, quibus posses consolari Albinum tuum. |
| 8 | Prospera, Deo donante, nobis sunt, nisi quod febris et infirmitas me fatigatum habet. |
| 9 | Tamen qui infirmior, fortior erit iuxta Apostolum (I Cor. I, 25); et saepe prodest infirmitas corporis [Cod. Sal. et Mabill., corporalis], ut fortitudo fidei crescat in anima. |
| 10 | [Adhuc se tota Spania errat in Adoptione.] Orate pro nobis, ut Spiritus sanctus Paraclitus inspiret animas servorum suorum ad defendendam catholicae fidei veritatem; quia tempus est, sicut legimus praedictum esse in libris sanctis. |
| 11 | Tu vero cum tuis semper sanam sequere doctrinam, et catholicam praedica diligenter fidem, ut aeternam mercedem cum multiplici fructu habere merearis. |
| 12 | Vivas felix et gaudeas in Christi amore cum tuis omnibus, Aquila charissime. |