Alcuinus, Epistolae, EPISTOLA XXXI. AD AGINUM EPISCOPUM. (Anno 796.) Petit sibi mitti per Angilbertum reliquias sanctorum, olim promissas.
| 1 | Dilectissimo Agino episcopo, Albinus magister salutem. |
| 2 | Recordetur charitas vestra quod praesenti collocutione aliquas mihi sanctorum reliquias dirigere promisisti; ut honorificetur Deus in illis, et nostra protegatur vita cum illis, et vestra accumuletur merces pro illis. |
| 3 | Ecce adest gerulus fidelis, filius equidem meus Angilbertus [Al., Engilpertus], per cuius manum mittere poteris quod vester [Forte, noster] amicus nobis dirigere curaverit. |
| 4 | Obsecro ut veraciter perficias quod hilariter promittebas. |
| 5 | Si quid enim benignitas vestra huius religiosae petitionis peregerit, humilitas nostra gratissime accipiet, vobisque secundum temporis opportunitatem et voluntatis vestrae agnitionem remunerare non desistet. |
| 6 | Et ubicunque sanctorum patrocinia perferuntur, ibi quotidie orationes pro vobis aguntur. |
| 7 | Divina te ubique comitetur benedictio, sanctissime Pater. |