Alcuinus, Epistolae, EPISTOLA XXX. AD PAULINUM. (Anno 796?) Desiderium suum cum Paulino colloquendi significat. Tres indiculos ad eum mittit; et doni a Liutgarde missi facit memoriam.
| 1 | Domino Patri Paulino Albinus salutem. |
| 2 | Ex eo sciri potest quanta mihi esset aviditas loquendi tecum, si facultatem confabulationis iniqua terrarum longinquitas non prohiberet; dum in unius dexteram portitoris, propter causas supervenientes, tres simul posui indiculos. |
| 3 | Unum sollicitudinis meae, alterum munusculi mei, tertium pro filiae meae Liutgardis feminae religiosae ac Deo devotae causa. |
| 4 | Nam illa sanctitati tuae duas direxit armillas auri obryzi, pensantes 24 denarios minus de nova moneta regis, quam libram plenam, ut orares pro ea cum sacerdotibus tuis: quatenus divina clementia dies suos disposuisset in salutem animae suae, et sanctae suae exaltationem Ecclesiae. |
| 5 | Ego de tua indubius fide suasi ut faceret. |
| 6 | Tu vero, Pater sancte, mei et illius memor ubique in Christi charitate valeto. |