Alcuinus, Epistolae, EPISTOLA XXIX. AD PAULINUM PATRIARCHAM. (Anno 796.) Semet constanti memoriae, baiulum vero litterarum eius patrocinio commendat.
| 1 | Venerando viro Paulino Aquileiensi patriarchae Albinus salutem. |
| 2 | Acceptis sapientiae vestrae apicibus et charitatis muneribus per hunc huius praesentis chartulae gerulum, valde gavisus, cognoscens prosperitatem vestram et memoriam nostri, quam semper paterna pietate ut habeas in orationibus sacris, supplex obsecro, memor semper benignae devotionis quam Iob habuit in filios suos. |
| 3 | Salus filii merces est patris: et laus genitoris filius sapiens. |
| 4 | Praesens vero harum portitor litterarum vestro auxilio et patrocinio nostrae sit commendatus petitioni [Forte, nostra petitione]. |
| 5 | Ipse vivo officio linguae nostras vel suas vobis ostendet necessitates. |
| 6 | Maiorem nostrae salutationis seriem Angilbertus filius communis noster Romam iturus volente Deo vobis diriget. |
| 7 | Sed nulla chartula sufficit charitatis effari dulcedinem, quam pleno ore anima mea de tuo hauserat pectore. |
| 8 | Testis est veritatis ille Spiritus per quem charitas diffusa est in cordibus nostris (Rom. V, 5). |
| 9 | Vivendo felix, felix, Pater optime, vive.
|
| 10 | Atque memor nati semper ubique vale.
|