Alcuinus, Epistolae, EPISTOLA XIII. Fragmentum. AD AEDILREDUM REGEM. (Anno 793.) Memorat de afflictione ecclesiae et civitatis Lindisfarnensis.
| 1 | Ecce ecclesia sancti Cuthberti sacerdotum (Dei) sanguine aspersa, omnibus spoliata ornamentis locus cunctis in Britannia venerabilior paganis gentibus datur ad depraedandum [Al., debellandum]. |
| 2 | Et ubi primum post discessum sancti Paulini ab Eboraco Christiana religio in nostra [Al., Northanimbrorum] gente sumpsit exordium, ibi miseriae et calamitatis coepit initium. |
| 3 | Quid significat pluvia sanguinis quam in quadragesimali tempore in Eboraca civitate, quae est caput totius regni, in ecclesia beati Petri principis apostolorum vidimus, de borealibus domus, sereno aere, de summo tecti minaciter cadere? |
| 4 | Nonne potest putari a borealibus partibus venire super terram sanguinem? |