Alcuinus, Epistolae, EPISTOLA XII. AD AEDILREDUM REGEM. (Anno incerto.) Hortatur ad regias virtutes.
| 1 | Domino dilectissimo Aedilredo [Cod. Sal. Edilrado] regi Alcuinus diaconus salutem. |
| 2 | Propter familiaritatem dilectionis familiares tibi soli litteras scribere curavi. |
| 3 | Et quia semper te amabo, semper te admonere non cessabo, ut Dei voluntati subditus, Dei protectione dignus efficiaris, et nobilitas regiae sublimitatis magna morum nobilitate honorificetur. |
| 4 | Non est liber vel nobilis qui peccatis serviet [Cod. Sal., servierit], dicente Domino: Omnis qui facit peccatum, servus est peccati (Ioan. VIII, 34). |
| 5 | Non decet te in solio sedentem regni rusticis vivere moribus. |
| 6 | Ira tibi non dominetur, sed ratio [Ms., gratia]. |
| 7 | Misericordia te amabilem faciat, non crudelitas odibilem. |
| 8 | Veritas audiatur ex ore tuo, non falsitas. |
| 9 | Castitatis tibi conscius esto, non libidinis; continentiae, non luxuriae; sobrietatis, non ebrietatis. |
| 10 | Noli notabilis esse in aliquo peccato, sed laudabilis in omni opere bono. |
| 11 | Largus esto in dando, non avarus in rapiendo. |
| 12 | Iustitia omnes tuos exornet actus. Esto forma [Ms., exemplum] honestatis omnibus te videntibus. |
| 13 | [Noli, noli rapere aliena, ne et propria perdas.] Deum time, qui dixit: In quo enim iudicio iudicabitis, iudicabitur de vobis (Matth. VII, 2). |
| 14 | Ama Deum Christum et eius obedire mandatis, quatenus illius misericordia tibi tuisque filiis et amicis in benedictione conservet [regnum], quod te habere voluit, et gloriam futurae beatitudinis concedere dignetur [Cod. Sal., dignabitur]. |
| 15 | Deus omnipotens regni felicitate, morum dignitate, longaeva prosperitate te florere faciat, dilectissime fili. |