Alcuinus, Epistolae, EPISTOLA VIII. AD BEORNUINUM PRESBYTERUM. (Anno 793.) Ab Offae regis et gentis Anglorum fidelitate se nunquam recessisse profitetur; monet ut et regibus, et episcopis, et principibus Dei voluntatem sequi suadeat, pacemque commendat.
| 1 | Beornuino presbytero Alcuinus diaconus salutem. |
| 2 | Dulces tuae dilectionis accepi litteras, mellifluis sensibus delibutas, apologeticam tenentes rationem, quarum melius credebam veritati, quam falsiloquae aliorum narrationi. |
| 3 | Nam fides amicitiae corde constare debet, non linguae versibilitate. |
| 4 | Utinam dignus essem pacem praedicare, non discordiam seminare; et signum portare Christi, non arma diaboli. |
| 5 | Nunquam tibi scripsissem, si noluissem pacem tecum habere, et pacem in Christo, quam coepimus, firmam permanere. |
| 6 | Vere Offae regi et genti Anglorum nunquam infidelis fui. |
| 7 | Sicut hos amicos quos mihi Deus donavit, fideliter, quantum valeo, servabo; sic et hos quos reliqui in patria. |
| 8 | Pauci sunt dies mei, et hos ipsos cum dolore flagelli suffero. |
| 9 | Ideo te obsecro ut in Domino, quos valeas, mihi intercessores acquiras. |
| 10 | Multis miseriis turbatum est hoc saeculum, et non est refrigerium in eo, nisi in misericordia Dei, et fide amicorum. Nudi venimus, et nudi recedimus (Iob II, 21), nisi qui bonis animam vestiet operibus. |
| 11 | Ut tibi, charissime frater, tempus vel locus occurrit, semper Dei suade voluntatem sequi omnibus personis: regi suaviter, episcopis honorifice, principibus fiducialiter, omnibus veraciter. |
| 12 | Nostrum est seminare, Dei fructificare. |
| 13 | Nec ulla tibi alicuius dissensionis inter nos remaneat suspicio. |
| 14 | Nec simus ex illorum numero de quibus dictum est: Non veni pacem mittere, sed gladium (Matth. X, 34). |
| 15 | Sed ex illorum simus numero, ad quos dictum est: Pacem meam do vobis, pacem meam relinquo vobis (Ioan. XIV, 27). |
| 16 | Ut pax Christi, quae exsuperat omnem sensum (Philip. IV, 7), custodiat corda nostra in charitate Christi et dilectione fraternitatis. |
| 17 | Paucis scripsi litterulis, quia sapienti pauca sufficiunt. |
| 18 | Sed te plurima Dei dona glorificent in aeternum, dilectissime frater. |