Alcuinus, De virtutibus et vitiis, CAPUT XXV. De humana laude non quaerenda.
| 1 | Dominus dicit in Evangelio: Attendite, ne iustitiam vestram faciatis coram hominibus, ut videamini ab eis (Matth, VI, 1), id est, ut ea intentione non faciatis bona, ut ab hominibus vanam laudem habeatis; sed quidquid homo facit boni, pro Dei amore et salute animae suae, et fraterna charitate faciat. |
| 2 | Ideo ipse Dominus dixit de quibusdam, qui eleemosynas faciunt, vel orationes et ieiunia, ut ab hominibus laudem accipiant: Amen dico vobis, receperunt mercedem suam (Matth. VI, 2). |
| 3 | Qui pro eo bonum quodlibet facit, ut ab hominibus laudetur, haec est merces illius quam quaesivit, et nullam a Deo sperare habet retributionem; quia pro eius amore non fecit, sed pro vana humanae laudis iactantia, sicut hypocritae facere solent. |
| 4 | Quod vitium hominibus placendi in bonis operibus, Dominus Iesus Christus multum detestatur, et saepius Pharisaeos, qui tales fuerunt in Iudaea, terribili [Al., tali] percutit maledictione, dicens: Vae vobis, hypocritae (Matth. XXIII, 13)! |
| 5 | [Nos autem non eos imitemur], sed secundum Apostolum: Qui gloriatur, in Domino glorietur (I Cor. I, 31). |
| 6 | Qui laudem non appetit, nec pro contumelia conturbatur. |
| 7 | Nec ideo se bonum existimet homo, quamvis ab alio laudetur, quia Deus inspector est cordis. |
| 8 | Quid enim prodest malo homini, si bonus praedicetur? |
| 9 | Tunc veraciter hoc quod agit homo bonum est, quando Deo placere desiderat, a quo habet quidquid boni habet vel facit. |
| 10 | Qui bona agere videtur, et per haec non Deo, sed hominibus placere cupit, in vanum laborat, et in ventum seminat. |
| 11 | Magnum se unusquisque esse studeat in suis operibus; sed de magnitudine sua humanum non quaerat favorem, ne perdat quod habuit, et sit parvus factus [Ms., et parvus efficiatur]. |
| 12 | Quidquid enim homo boni faciat, hoc se sciat habere non a se, sed a Deo. |
| 13 | Increpat eos beatus Paulus apostolus qui in suis gloriantur benefactis, dicens: Quid habes, quod non accepisti? |
| 14 | Si autem accepisti, quid gloriaris, quasi non receperis (I Cor. IV, 7)? |
| 15 | Qui aliquod donum Dei quod meruit, in suam laudem convertit, procul dubio virtutem in vitium transfert, et bonum quod fecit, in peccatum. |
| 16 | Cum enim causa iactantiae pascitur pauper, etiam ipsum misericordiae opus in peccatum convertitur. |
| 17 | Quidquid homo boni agit, Deo quaerat laudem, non sibi, sicut ipse Dominus in Evangelio ait: Sic luceat lux vestra coram hominibus, ut videant opera vestra bona, et glorificent Patrem vestrum, qui in coelis est (Matth. V, 16). |