Alcuinus, De virtutibus et vitiis, CAPUT XV. De timore Domini.
| 1 | Initium sapientiae timor Domini (Psal. CX, 10). |
| 2 | Magna est cautela peccati Deum semper praesentem [Ms., Dei praesentiam] timere. |
| 3 | Qui perfecte Deum timet, diligenter se a peccatis custodit. |
| 4 | Timenti Deum in novissimo die bene erit, et merces eius in aeternum permanet (Eccli. I, 13). |
| 5 | Qui erubescit in conspectu hominis peccare, quanto magis debet erubescere in conspectu Dei iniquitatem agere, qui non solum opera, sed et corda considerat. |
| 6 | Qui timore sancto Deum metuunt, inquirunt quae bona placita sunt illi. |
| 7 | Alius est timor filiorum, alius est timor servorum. |
| 8 | Servi enim propter tormenta dominos timent, filii vero propter amorem patres timent. |
| 9 | Si filii Dei sumus, timeamus eum ex charitatis dulcedine, non de timoris amaritudine. |
| 10 | Homo sapiens in omnibus operibus suis metuit Dominum, sciens se nunquam eius praesentiam fugere posse, sicut Psalmista Deo dicit: Quo ibo a spiritu tuo, et quo a facie tua fugiam (Psal. CXXXVIII, 7)? |
| 11 | Iterum: Quia neque ab Oriente, neque ab Occidente (Psal. LXXIV, 7), subauditur, patet locus fugiendi Deum. |
| 12 | Qui timet Deum, accipiet doctrinam eius, et qui vigilaverint in mandatis illius, invenient benedictionem sempiternam (Eccli. XXXII, 18). |
| 13 | Timentis Deum beata est anima (Eccli. XXXIV, 17), et a tentatione diabolica tuta remanet. |
| 14 | Beatus homo, qui semper est pavidus (Prov. XXVIII, 14), et cui donatum est Dei timorem semper ante oculos habere. |
| 15 | Qui timet Dominum, recedit ab itinere pravo, et ad virtutis semitam vias suas dirigit. |
| 16 | Timor Domini repellit peccata, et adiicit virtutes. |
| 17 | Timor cautum facit hominem et sollicitum, ne peccet. |
| 18 | Ubi vero timor Domini non est, ibi dissolutio vitae est. |
| 19 | Quisquis Deum in prosperis non timet, vel [Ms., saltem] in adversis refugiat ad illum, qui flagellat, ut sanet. |
| 20 | Beatus vir, qui timet Dominum, in mandatis eius cupit nimis (Psal. CXI, 1). |
| 21 | Timor Dei timorem gehennae expellit. Sic [ergo] timeamus Deum, ut diligamus eum; quia perfecta charitas foras mittit timorem servilem (I Ioan. IV, 18). |