Alcuinus, De virtutibus et vitiis, CAPUT XIV. De non tardando converti ad Deum [Al., De conversione ad Dominum ].
| 1 | Legitur in litteris divinitus inspiratis dictum: Fili, ne tardes converti ad Deum [Ms., Dominum], quia nescis, quid futura pariat dies (Eccli. V, 8). |
| 2 | Qui tardat converti, periculum facit animae suae, quia mors non tardat (Eccli. XIV, 12). |
| 3 | Quae si tardantem converti inveniet, ad tormenta deducit eum. |
| 4 | Dissoluta et paralytica [Ms., periculosa] cogitatio est, de crastina cogitare conversione, et hodiernam negligere. |
| 5 | Quid tu peccator [converti] dissimulas, et non metuis, ne tibi mors repentina subripiat diem conversionis? |
| 6 | Nonne homines subito moriuntur? |
| 7 | Si bonum est peccata dimittere, et ad Deum converti, cito fiat. |
| 8 | Deus tibi promittit remissionem convertenti a peccatis, securitatem tibi non promisit diu vivendi. |
| 9 | [Lege prophetas, lege Apostolum, et vide si tibi promissa sit hora aut dies.] Ideo convertat se citius unusquisque ad Deum, et cum invenerit eum, derelinquat impius viam suam. |
| 10 | Si subito intrat dies extremus, perit dilatio, et restat damnatio. |
| 11 | Perire non vis, redi ad Deum, et vives. |
| 12 | Noli desperare [Ms., peccando sperare] de venia peccatorum, nec de vita longiori confidere. |
| 13 | Convertere ergo, et poenitentiam age. |
| 14 | Cras, inquies, convertam. |
| 15 | Quare non hodie? |
| 16 | Quid mali, dicis, si cras dicam? |
| 17 | Quid mali, si hodie? |
| 18 | Forte dicis: Longa erit vita mea. |
| 19 | Dicam, si longa sit [Ms., erit], bona sit; si brevis, et ipsa bona sit. |
| 20 | Quis ferat malum longum? |
| 21 | Prandium longum non vis habere malum, et vitam longam vis habere malam? |
| 22 | Villam emis: bonam desideras. |
| 23 | Uxorem vis ducere: bonam quaeris. |
| 24 | Filios tibi nasci vis: bonos optas. |
| 25 | Et ut etiam de rebus vilissimis loquar, caligas emis, et non vis malas: et vitam amas malam? |
| 26 | Quid te offendit vita tua, quam solam vis malam, ut inter omnia bona [tua] solus sis malus? |
| 27 | Neque tardes converti ad Dominum, et ne differas de die in diem (Eccli. V, 8). |
| 28 | Verba Dei sunt, non mea. |
| 29 | Non a me haec audisti, sed ego tecum audio a Domino. |
| 30 | Forte respondes: Cras, cras. |
| 31 | O vox corvina! |
| 32 | Corvus non redit ad arcam, columba redit. |
| 33 | Si enim tunc vis poenitentiam agere quando peccare non potes, peccata te dimiserunt, non tu illa. |
| 34 | Satis alienus a fide est, qui ad agendam poenitentiam tempus senectutis exspectat. |
| 35 | Metuendum est, ne dum sperat misericordiam, incidat in iudicium. |
| 36 | Neque enim tunc veniam inveniet, qui modo aptum veniae tempus perdidit. |
| 37 | Ibi iam a Deo non potest mereri quod petit, qui hic noluit audire quod iussit. |
| 38 | Qui tempus poenitentiae datum [sibi] negligit, frustra ante tribunal Christi preces effundit. |
| 39 | Festinare debet ad Deum convertendo unusquisque, dum potest, ne si, dum potest, noluerit, omnino cum tarde voluerit, non possit. |