Alcuinus, De virtutibus et vitiis, CAPUT XIII. De poenitentia.
| 1 | Cuius ipse Salvator in Evangelio virtutem ostendit, dicens: Poenitentiam agite, appropinquabit enim regnum coelorum (Matth. III, 2). |
| 2 | Et Ioannes Baptista ait: Facite fructus dignos poenitentiae (Luc. III, 8). |
| 3 | Fructus est dignus poenitentiae, transacta flere peccata, et eadem iterum non agere, sicut Scriptura ait: Non adiicies peccatum super peccatum (Eccli. V, 5). |
| 4 | Lavamini, dicit Dominus per Isaiam prophetam, et mundi estote (Isai. I, 16). |
| 5 | Lavatur itaque et mundus est, qui praeterita plangit, et iterum flenda non admittit [Al., non committit]. |
| 6 | Lavatur et non est mundus, qui plangit quod gessit, nec deserit: et post lacrymas haec quae fleverat, repetit. |
| 7 | De his qui post lacrymas ad delicta revertuntur peiora [Al., priora], beatus Petrus terribiliter ait: Canis revertitur ad vomitum suum (II Petr. II, 22). |
| 8 | Fili, peccasti, dicitur in Scriptura sancta, non adiicias iterum, sed de pristinis deprecare, et remittentur tibi (Eccli. XXI, 1). |
| 9 | Poenitentia vera non annorum numero censetur, sed amaritudine animi. |
| 10 | Unde beatus Petrus mox a Domino indulgentiam recepit, quia amarissime flevit trinae negationis culpam. |
| 11 | Poenitentia, quamvis sit exigui temporis; si intima cordis amaritudine agitur, non despicitur apud iudicem iustum Deum, qui cordis secreta considerat. |
| 12 | Non enim longitudinem temporis tantum requirit Deus, quantum affectum sinceritatis [poenitentis] pensat. |
| 13 | Qui enim in Christum tota mente confidit, etiamsi in multis moriatur peccatis, fide sua vivit in aeternum, sicut ipse Dominus in Evangelio ait: Ego sum resurrectio et vita. |
| 14 | Qui credit in me, etiamsi mortuus fuerit, vivet: et omnis qui vivit et credit in me, non morietur in aeternum (Ioan. XI, 25). |
| 15 | De morte animae dixit, quia propter peccatorum aegritudinem [Al., quae pro aegritudine] eveniet illi. |
| 16 | Deus autem natura misericors est, paratus est salvare per misericordiam, quos non veniet [Ms., invenit] salvare per iustitiam, qui vult omnes salvos fieri, et neminem perire (I Tim. II, 4): qui per prophetam ait: In quacunque die conversus fuerit peccator, vita vivet, et non morietur (Ezech. XVIII, 21). |
| 17 | Quamvis quisque sit peccator et impius, si ad poenitentiam convertatur, consequi posse veniam se per Dei misericordiam non dubitet. |
| 18 | In hoc saeculo poenitentiam facientibus Dei misericordia subvenit. |
| 19 | In futuro autem poenitentia non proficit, sed rationem nostrorum [operum] reddituri sumus. |
| 20 | In hac vita tantum poenitenti [Ms., poenitentiae] patet libertas, post mortem vero nulla correctionis est licentia. |