Alcuinus, De virtutibus et vitiis, CAPUT II. De fide.
| 1 | Sed haec cognitio divinitatis et scientia veritatis per fidem catholicam discenda est; quia sine fide impossibile est placere Deo (Hebr. XI, 6). |
| 2 | Vere beatus est, qui et recte credendo bene vivit, et bene vivendo fidem rectam custodit. |
| 3 | Igitur sicut otiosa est fides sine operibus [bonis], ita nihil proficiunt opera bona sine fide recta. |
| 4 | Unde et beatus Iacobus apostolus dixit: Quid proderit, fratres mei, si fidem quis dicat se habere, opera autem non faciat [Codd. mss. habeat]? |
| 5 | Nunquid poterit fides salvare eum? |
| 6 | Fides sine operibus mortua est [Codd. mss., otiosa est]. |
| 7 | Sicut enim corpus sine spiritu mortuum est, ita et fides sine operibus mortua est (Iac. II, 14 seqq.): de cuius excellentia est alterius temporis disputare; quia breviarium, quod de mandatis Dei tibi petisti districto sermone fieri, profundissimas de fide catholica rationes [Edit., orationes, mendose] explicare non poterit. |