Alcuinus, De orthographia, littera u
| 1 | uinea si arborem significat, in prima syllaba i debet habere, secunda e; si ad indulgentiam pertinet, prima syllaba e et secunda i habeat, ut est uenia. |
| 2 | urgere debemus dicere, non urguere: Virgilius urgentur poenis, item urgere tela manu. |
| 3 | uaccas, si animalia significant, per u; si flores lauri, idest baccas, per b scribatur. |
| 4 | uallis et uallum per u scribendum est, ballistra et ballena per b. |
| 5 | ualua quod est ostium per u; balba, mobile nomen, balbus balba balbum, quod est tardiloqua, per b scribitur. |
| 6 | ualde aduerbium a ualido nomine ueniens, unde ualde corrupte dicitur, per u scribendum est, quasi ualide. |
| 7 | uellus, si lanam significat, per u; si bellus, id est pulcher, per b scribitur. |
| 8 | uer et uir per u scribenda sunt. |
| 9 | uel, si coniunctio est, per u; si humorem significat, per f; si idolum per b scribendum est. |
| 10 | uos si pronomen monosyllabum per u, si disyllabum erit prior syllaba ab u, sequens a b incipit; si animal significat, monosyllabum per b; si disyllabum, prior syllaba a b, sequens ab u incipit, ut bos bouis boui bouem bos a boue. |
| 11 | uerba prior syllaba ab u, posterior a b incipiat. |
| 12 | ulciscor ultus sum facit. |
| 13 | uolo uolas a uolando; uolo uis a uoluntate, quod imperatiuum naturaliter non habet, quia imperata necessitatis sunt, non uoluntatis. |
| 14 | uis duplicem significationem habet: et uirtutis uidelicet, quod Grece δύναμις dicitur, et uiolentiae, quod Grece βία uocatur. |
| 15 | uerbex ouis ab u incipiendum est et facit genetiuum uerbecis, longa e in secunda syllaba; dum uertex cortex codex i breuem habent in obliquis casibus, ut uerticis corticis codicis et cetera talia. |
| 16 | ulterior et ultimus positiuum gradum non habent. |
| 17 | ueniunt qui uendunt; ueneunt qui uenduntur. |
| 18 | uelocitas, pedum et corporum; celeritas, animorum et factorum. |
| 19 | ulcus quod nascitur; uulnus quod per alium fit. |
| 20 | urgeo non urgueo: Vergilius urgentur poenae. |
| 21 | ungo unxi, quo modo pingo pinxi, utrumque sine u; attamen ad nomen diriuatiuum addit, ut pinguis unguine. |
| 22 | uulua malua stiua per u loco consonantis scribentur. |
| 23 | uas uadis de fenore genere masculino, uas uasis de uasculo neutrum, utraque per u. |
| 24 | fas per f indeclinabile; unde fasti dies, quibus ius fatur. |
| 25 | uillus est uestimenti, uilla possessio. |
| 26 | uesper incerti generis est, ut Prisciano placet; ideo euangelista dixit uespere quae lucescit in prima sabbati. |