Alcuinus, De orthographia, littera m
| 1 | munimentum a muniendo; monumentum ad sepulcrum pertinet. |
| 2 | mille per duo l, licet milia per unum l scribatur. |
| 3 | malum, si fructum significat, longam a, si nequitiam, breuem dicito; malus quoque, id est arbor nauis, longam a, malus homo breuem habet a litteram. |
| 4 | machina per c et h scribendum, id est argumentum. |
| 5 | macte id est magis aucte. |
| 6 | mollis si ad mollitiem per duo l, moles si ad pondus per unum l scribatur. |
| 7 | manes dii infernales, mane sine s diei initium. |
| 8 | marsuppium per duo p. |
| 9 | mas primitiuum, masculus diminutiuum. |
| 10 | machera per c et h, id est gladius; maceria, id est murus, per simplicem e scribendum est. |
| 11 | menda deceptio uel fraus, inde mendax et inde mendacium. |
| 12 | metalla per duo l. |
| 13 | Mars et Mauors unum est, unde et Mauortia quidam dici uolunt. |
| 14 | manuuiae obliuium diluuium suauium liuidum Fauius Flauius auidus fluuius ciuitas exuuiae: per u consonantem et i breuem proferuntur. |
| 15 | mulceo et mulgeo in unum perfectum ueniunt, mulsi. |
| 16 | Mattheus et Matthias per duo t, quod Greci per τ et θ scribunt. |
| 17 | malo, id est magis uolo, et nolo, id est ne uolo, per unum l; malle uelle et nolle per duo l. |
| 18 | mando mandas a mandando, mando mandis a manducando. |
| 19 | mitto per duo t, et ideo in praeterito perfecto per duo s scribatur, id est missi. |
| 20 | magnus: g sequenti syllabae iungatur. |
| 21 | magister maior in statione, nam isteron Grece statio dicitur. |