Alcuinus, De orthographia, littera i
| 1 | interuallum per duo l scribendum est. |
| 2 | id pronomen ab eo quod est is ea id, per d scribitur: it uero, quod fit ab eo is it, per t scribitur. |
| 3 | inter praepositio in una uoce sequente mutat r in l, ut intellego; in aliis integra manet, ut interitus. |
| 4 | iacet qui cadit; iacit qui mittit quodlibet missile. |
| 5 | impar per m scribendum est. |
| 6 | illexit si per e seduxit significat, si per u illustrationem. |
| 7 | incestum scribendum est, licet ueniat ab incasto. |
| 8 | identidem per n in priore loco scribendum est, licet sit ab idem et itidem compositum. |
| 9 | innixus procumbens; innexus ligatus. |
| 10 | indigena inde natus; incola aliunde ueniens. |
| 11 | intempestiuum ueteres dixerunt inoportunum, tempestiuum oportunum a tempore dicitur. |
| 12 | sic immaturitas nocturnum tempus est quod non est maturum, id est oportunum ut agatur aliquid uigilando, quod etiam uulgo dici solet hora importuna. |
| 13 | iuuenis iuuenior superlatiuum non habet, ut senex senior; solent autem iunior et senior ad se inuicem dici minor et maior. |
| 14 | ipsum neutro genere dicendum est, non ipsud, ut illud et istud, quoniam ueteres nominatiuum masculinum non ipse, sed ipsus dicebant, unde et in euangelio omnia per ipsum facta sunt id est uerbum. |
| 15 | inpingo facit praeteritum perfectum inpinxi et inpegi. |
| 16 | ira repentino animi motu nascitur; iracundia perpes est uitium. |
| 17 | inuidus qui inuidet, inuidiosus qui inuidiam sustinet. |
| 18 | interpretor per simplicem e et omnia quae ab eo sunt scribenda. |
| 19 | impleo per m, non per n. |
| 20 | in praepositio, si composita sit et p aut b uel m sequatur, n in m conuertit, ut improbus imbuit immutat impius; quotiens uero g sequitur illam, amittit n, ut ignarus ignotus; nam gnarus et gnotus simplices sunt. |
| 21 | inclytus Grecum nomen est, nam clyton Greci gloriosum dicunt. |
| 22 | idiota Grecum est, Latine imperitus. |