Alcuinus, De orthographia, littera g
| 1 | gnatus per g et n scribendum, sicut gnauus, quia et in conpositione ipsam retinent g, ut agnatus ignauus. |
| 2 | gaudium animi, laetitia et exultatio etiam uerborum atque membrorum. |
| 3 | gremium interius, sinum exterius. |
| 4 | git monoptoton et pluralem numerum non habet, est autem neutri generis et per omnes casus declinatur. |
| 5 | gnarus doctus perfectus sciens, gnauus fortis agilis. |
| 6 | garrit subtiliter murmurat, garrulus uerbosus loquax. |
| 7 | gestit, uult cupit optat desiderat; gestat, portat. |
| 8 | gloriosus a frequentia claritatis dictus, pro c g littera commutata est. |
| 9 | grandaeuus quasi grandis aeuo, ideo per duo u scribitur. |
| 10 | gratulor pro gaudeo et gratias ago. |