Alcuinus, De orthographia, littera b
| 1 | b in s mutatur sequentibus t et c, ut sustulit suscepit. |
| 2 | benedictio et oratio et talia t debent habere in paenultima syllaba, non c. |
| 3 | bis aduerbium per b, uis nomen per u scribitur. |
| 4 | bile si fel significat per b, si abiectum aliquid, quod est uile, per u scribendum est. |
| 5 | berna si domi genitum significat, id est οἰκογενής, per b scribendum est, si tempus, ut uerna tempora, per u scribi auctores uoluerunt. |
| 6 | berbena utraque syllaba per b incipiat. |
| 7 | Belzebub non Belzebul; Belial non Beliar dici debet. |
| 8 | baptismus baptismi genere masculino, et baptisma baptismatis et baptismum baptismi inuenitur. |
| 9 | b littera contra f non sonat, sed in eam transit in conpositione, ut offui non obfui, suffero pro subfero. |
| 10 | b quoque in s transire solet multis in locis, ut sustuli suscipio sustineo suspendo pro subtuli et subcipio et subteneo et subpendo. |
| 11 | bes siue bisse, quod significat VIII uncias, per b scribendum est. |
| 12 | bimus quasi bihiemis, et inde bimatus diriuatur, a b incipit et biennis quasi duorum annorum. |
| 13 | beniuolus et benificus licet a bene aduerbio sit conpositum, tamen per i non per e scribitur; similiter et maliuolus et malificus, sicut a pace pacificus. |
| 14 | bibo a potu per duo b et facit bibi praeteritum; uiuo a uita per duo u et facit praeteritum uixi, et ambo consonantes. |
| 15 | biuium iter duplex, prima syllaba a b incipit, secunda ab u consonante. |
| 16 | breuis secunda syllaba per u, inde breuiter. |
| 17 | balteum, cingulum, per e scribatur. |
| 18 | beo beas inde beatus, sicut meo meas inde meatus, et creo creas inde creatus. |