Alcuinus, De grammaria, DE FIGURIS VERBORUM.
| 1 | FR. Figuratas verborum compositiones, precor, expone. |
| 2 | - SAXO. Sunt verba simplicia, ut cupio, taceo. Et [sunt] composita, [ut] concupio, conticeo. |
| 3 | Sunt et decomposita, id est, a compositis derivata [Edit., derivativa], ut concupisco, conticesco. |
| 4 | Sunt et ex tribus partibus composita, ut perterrifico. |
| 5 | Sunt et quae mutant in compositione coniugationem, ut: do, das, facit reddo, reddis; facio, facis, amplifico, amplificas. |
| 6 | Sunt composita, quorum simplicia in usu non sunt, ut offendo, aspicio, aperio, refragor. |
| 7 | Fendo [enim], et spicio, et perio, et fragor non reperi. |
| 8 | Sunt quae genus mutant in compositione: Sperno, spernis, activum; aspernor, aspernaris, deponens. |
| 9 | [Sentio, neutrum; assentior, deponens.] Sedeo, sedes, neutrum; insidior, insidiaris, deponens; obsideo vero et adsideo activa sunt. |
| 10 | Eo et facio neutra sunt; adeo, subeo, perficio, conficio, et ex eis composita activa sunt; faciunt [enim] adeor, subeor, perficior, conficior. |
| 11 | Ex facio quoque neutro, versificor, versificaris, et gratificor, gratificaris, deponentia nascuntur. |
| 12 | Complecto, activum; amplector, deponens. |
| 13 | Componuntur verba cum nominibus, ut ab amplo et facio, amplifico, ex quo participium amplificans: et cum altero verbo, ut calefacio, id est, calere facio; vel cum adverbio, ut, benedico; vel cum praepositione, ut indico, subeo. |
| 14 | Sed praepositionibus per compositionem iunguntur semper sicut nominativo casu [Edit., casui], cuius vim ubique obtinent verba per omnes personas, ut, facio ego, facis tu, facit ille, nisi imperativa secundae personae, [quae] vocativum [Ed., vocem] adsciscunt, ut scribe, Virgili: lege, Terenti. |