Alcuinus, De fide S. Trinitatis, 3, CAPUT VI. Cur solus Pater missus non legatur?
| 1 | Ideo Pater missus non legitur, quia incarnatus non creditur. |
| 2 | Congruenter dictus est missus ille, qui in carne apparuit [misisse autem illum, qui in ea non apparuit]. |
| 3 | Forma igitur illa suscepti hominis, Filii persona est, non etiam Patris. |
| 4 | Quapropter Pater invisibilis una cum Filio secum invisibili, eumdem Filium visibilem faciendo, misisse eum dictus est. Ita vero accepta [est] forma servi, ut maneret incommutabilis forma Dei. |
| 5 | Quod vero in Filio apparuit carnalibus oculis, ab invisibili sancta Trinitate factum est [sicut Abrahae et Moysi, et Ioanni Baptistae et tribus discipulis in monte]. |