Alcuinus, De fide S. Trinitatis, 1, CAPUT VIII . Quod non sit maius aliquid Pater et Filius et Spiritus sanctus simul dicti, quam unaquaelibet persona ex eis.
| 1 | Absque omni scilicet dubitatione credi necessarium est quod Pater plenus et perfectus est Deus, Filius plenus et perfectus est Deus, Spiritus sanctus plenus et perfectus est Deus: non tamen tres dii, Pater et Filius, et Spiritus sanctus, sed unus Deus plenus et perfectus. |
| 2 | Nec aliquid maius tres simul dicti, Pater, et Filius, et Spiritus sanctus, quam unusquislibet, vel Pater, vel Filius, vel Spiritus sanctus; quia eadem magnitudo est in unaquaque persona semel dicta, quae est in tribus personis simul nominatis. |
| 3 | Non ita dicimus in hominibus fieri posse; Abraham plenus homo, Isaac plenus homo, Iacob plenus homo, et hi omnes sunt unius substantiae, quantum ad humanam pertinet naturam: non tamen hi tres sunt unus homo, sed tres omnimodo homines; et aliquid maius in tribus cognoscitur, quam in quolibet uno eorum. |
| 4 | Item Abraham unus homo, non tamen tres personae in eo, sicut in uno Deo tres sunt personae plenae et perfectae; sed una persona in Abraham, sicut in uno solet homine esse. |