Alcuinus, De fide S. Trinitatis, 1, CAPUT IV . Quod Spiritus sanctus relative dicitur ad Patrem et Filium: [ sed non eodem modo, quo inter se Pater et Filius ].
| 1 | Prorsus et Spiritus sanctus relative dicitur ad Patrem et Filium, sed non eodem modo quo inter se Pater et Filius. |
| 2 | Sicut enim relative Pater et Filius dicuntur, ita et Spiritus sanctus ad Patrem et Filium quodammodo relative dicitur, quia Patris et Filii Spiritus est. |
| 3 | Sed ipsa relatio Spiritus sancti non ita reciproca ratione converti poterit, sicut Pater et Filius. |
| 4 | Nam Pater Filii pater dicitur, et Filius Patris filius dicitur. |
| 5 | Spiritus vero sanctus uniformiter dicitur ad Patrem et Filium, quia Patris et Filii Spiritus est. |
| 6 | Dicimus enim Spiritum sanctum, Spiritum Patris: sed non vicissim dicimus, Patrem Spiritus sancti, ne filius eius intelligatur Spiritus sanctus. |
| 7 | Item dicimus Spiritum sanctum, Spiritum Filii: sed non dicimus, Filium Spiritus sancti, ne Pater eius intelligatur Spiritus sanctus. |
| 8 | Dicitur et idem Spiritus [sanctus] donum Dei, quia Deus donator doni sui est. |
| 9 | In quibus nominibus circumferri potest vicissim relationis regula, ut si dicamus: donator doni et donum donatoris. |
| 10 | Quia in his vocabulis potuit inveniri usitata huic categoriae, quae dicitur, ad aliquid, circumlatio. |