Alcuinus, De fide S. Trinitatis, 1, CAPUT III . Quod quaedam de Deo substantialiter, quaedam relative dicuntur.
| 1 | Sciendum est quod quaedam de Deo substantialiter dicuntur, ut est, Deus magnus, omnipotens, [et] quidquid ad se dicitur, id est, substantiam divinitatis significans. |
| 2 | Quaedam itaque relative dicuntur, ut Pater ad Filium, et Filius ad Patrem, et Spiritus sanctus relative ad Patrem et Filium. |
| 3 | Ad se autem sive Pater, sive Filius, sive Spiritus sanctus Deus [substantialiter] dicitur. Itaque Pater eo, quo [Al., quod] Deus est, hoc ipso substantia est. |
| 4 | Quia eiusdem substantiae Filius [et Spiritus sanctus], procul dubio, et Filius Deus, et Spiritus sanctus Deus. |
| 5 | At vero Deus eo quo [Al., quod] Pater est, relative dicitur, quia non substantiae nomen est, sed refertur ad Filium. |
| 6 | Non sic dicimus Filium Patrem esse, quomodo dicimus Filium Deum esse; nec ita dicimus Patrem Filium esse, sicut dicimus Deum esse, quia Deus substantialiter dicitur; Pater, et Filius, et Spiritus sanctus relative dicuntur. |