Alcuinus, De fide S. Trinitatis, INVOCATIO AD SS. TRINITATEM, INVOCATIO AD SS. TRINITATEM, ET FIDEI SYMBOLUM EIUSDEM.
| 1 | Adesto, lumen verum, Pater, omnipotens Deus. |
| 2 | Adesto lumen de lumine, Verbum et Filius Dei, Deus omnipotens. |
| 3 | Adesto sancte Spiritus, Patris et Filii concordia, Deus omnipotens. |
| 4 | Adesto, Deus unus omnipotens, Pater, et Filius, et Spiritus sanctus. |
| 5 | Doce fidem, excita spem, infunde charitatem. |
| 6 | Velle mihi adiacet, sed hoc non a me, sed a te, Mundum, et terras linquere, et coelum petere. |
| 7 | Sed imbecilla pluma est, velle sine subsidio tuo. |
| 8 | Da fidei pennas, ut volem sursum ad te. |
| 9 | Hanc fidem in te, per te, de te confiteor. |
| 10 | Te unum in substantia, Trinitatem in personis confiteor. |
| 11 | Te semper idem esse, vivere, et intelligere confiteor. |
| 12 | Et tres unum, et unum tres confiteor. |
| 13 | Pater et Filius et Spiritus sanctus, o beata Trinitas. |
| 14 | Deus, Dominus, Paracletus, o beata Trinitas. |
| 15 | Charitas, gratia, communicatio, o beata Trinitas. |
| 16 | Charitas Deus est, gratia Christus, communicatio Spiritus sanctus, o beata Trinitas. |
| 17 | Genitor, genitus, regenerans, o beata Trinitas. |
| 18 | Verum lumen, verum lumen ex lumine, vera illuminatio, o beata Trinitas. |
| 19 | Invisibilis invisibiliter, visibilis invisibiliter, invisibilis visibiliter, o beata Trinitas. |
| 20 | Fons, flumen, irrigatio, o beata Trinitas. |
| 21 | Ab uno omnia, per unum omnia, in uno omnia, o beata Trinitas. |
| 22 | A quo, per quem, in quo omnia, o beata Trinitas. |
| 23 | Vivens vita, vita a vivente, vivificator viventium, o beata Trinitas. |
| 24 | Unus a se, unus ab uno, unus ab ambobus, o beata Trinitas. |
| 25 | Ὤν a se, ὤν ab altero, ὤν ab utroque, o beata Trinitas. |
| 26 | Omne autem ὤν semper in tribus, et omne ὤν aequaliter in singulis, o beata Trinitas. |
| 27 | Verax Pater, veritas Filius, veritas Spiritus, o beata Trinitas. |
| 28 | Una igitur Pater, λογός, Paracletusque substantia est, o beata Trinitas. |
| 29 | Una essentia, una virtus, una bonitas, o beata Trinitas. |
| 30 | Deus beatitudo, in quo, et a quo, et per quem beata sunt quaecunque beata sunt omnia, o beata Trinitas. |
| 31 | Deus vera et summa vita, in quo et a quo, et per quem vivunt quaecunque vere, summeque vivunt omnia, o beata Trinitas. |
| 32 | Deus bonum et pulchrum in quo, et a quo, et per quem bona et pulchra sunt, quaecunque bona et pulchra sunt omnia, o beata Trinitas. |
| 33 | Deus cui nos fides excitat, spes erigit, charitas iungit, o beata Trinitas. |
| 34 | Deus qui petere iubes, et invenire facis, et pulsantibus aperis, o beata Trinitas. |
| 35 | Deus supra quem nihil, extra quem nihil, sine quo nihil, o beata Trinitas. |
| 36 | Deus sub quo totum, in quo totum, cum quo totum, o beata Trinitas. |
| 37 | Te invocamus, te adoramus, te laudamus, o beata Trinitas. |
| 38 | Exaudi, exaudi, exaudi, o beata Trinitas. |
| 39 | Spes nostra, salus nostra, honor noster, o beata Trinitas. |
| 40 | Auge in nobis fidem, auge spem, auge charitatem, o beata Trinitas. |
| 41 | Libera nos, salva nos, iustifica nos, o beata Trinitas. |
| 42 | Miserere, Domine, quia misericordia tua liberavit nos, o beata Trinitas. |
| 43 | Miserere, Domine, quia misericordia tua credimus in te, o beata Trinitas. |
| 44 | Miserere, Domine, quia misericordia tua cognovimus te, o beata Trinitas. |
| 45 | Miserere, Domine, quia misericordia tua speramus in te, o beata Trinitas. |
| 46 | Miserere, Domine, quia misericordia tua amamus te, o beata Trinitas. |
| 47 | Te adoramus cuncti unum Deum Patrem, et Filium, sanctumque Spiritum, o beata Trinitas. |
| 48 | Da peccatis veniam, praesta aeternam vitam, dona pacem et gloriam, o beata Trinitas. |
| 49 | O beata, et benedicta, et gloriosa Trinitas, Pater, et Filius, et Spiritus sanctus [o beata Trinitas]. |
| 50 | O beata, benedicta, gloriosa unitas, Pater, Filius, Spiritus sanctus, [o beata Trinitas]. |
| 51 | O vera, summa, sempiterna Trinitas, Pater, et Filius, et Spiritus sanctus, [o beata Trinitas]. |
| 52 | O vera, summa, sempiterna unitas, Pater, Filius, Spiritus sanctus [o beata Trinitas]. |
| 53 | Miserere nobis, miserere nobis, miserere nobis, o beata Trinitas. |
| 54 | Tibi laus, tibi gloria, tibi gratiarum actio in saecula sempiterna, o beata Trinitas. |
| 55 | Credimus sanctissimam [Al., sanctam] Trinitatem, id est, Patrem, et Filium, et Spiritum sanctum, unum Deum omnipotentem, unius substantiae, unius essentiae, unius potestatis, creatorem omnium creaturarum; a quo omnia, per quem omnia, in quo omnia. |
| 56 | [Credimus] Patrem a seipso, non ab alio; Filium a Patre genitum, Deum verum de Deo vero, lumen verum de lumine vero: non tamen duo lumina, sed unum lumen. |
| 57 | Spiritum sanctum a Patre et Filio aequaliter procedentem; consubstantialem, coaeternum Patri et Filio. |
| 58 | Pater plenus Deus in se, Filius plenus Deus a Patre genitus, Spiritus sanctus plenus Deus a Patre et Filio procedens. |
| 59 | Non tamen tres deos dicimus, sed unum Deum omnipotentem, aeternum, invisibilem, incommutabilem, qui totus ubique est, totus ubique praesens: non per partes divisus, sed totus in omnibus non localiter, sed potentialiter. |
| 60 | Qui sine communicatione sui, mutabilia creavit et creata gubernat, semper manens quod est. |
| 61 | Cui nihil accidens esse poterit, quia simplici divinitatis naturae nil addi, vel minui potest, quia semper est quod est, cui proprium est, cui sempiternum est, cui idem est, esse, vivere, et intelligere. |
| 62 | Et haec tria unus Deus, et unus Deus haec tria; idem Deus et Dominus [Ms. SanctGerm.: Et haec tria unus Deus et unus Dominus; haec tria idem Deus et Dominus, etc.] vera et sempiterna Trinitas in personis, vera et sempiterna unitas in substantia, quia una est substantia Pater, et Filius, et Spiritus sanctus. |
| 63 | Haec vero sancta Trinitas, nil maius est in tribus personis simul nominatis quam in una qualibet persona semel dicta; quia unaquaeque persona plena est substantia in se, non tamen tres substantiae, sed unus Deus, una substantia, una potentia, una essentia, una aeternitas, una magnitudo, una bonitas Pater, et Filius, et Spiritus sanctus. |
| 64 | Nec aliud est Pater in natura quam Filius vel Spiritus sanctus; nec aliud Filius, et Spiritus sanctus quam Pater in natura, quibus est una natura. |
| 65 | Sed alius est Pater in persona, alius Filius in persona, alius Spiritus sanctus in persona. |
| 66 | In Patre aeternitas [Ms. SanctGerm.; in Patre manet aeternitas], in Filio aequalitas, in Spiritu sancto aeternitatis aequalitatisque connexio. |
| 67 | Unum omnes in substantia, et essentia, omnipotentia, et deitate. |
| 68 | Sicut enim eadem sancta Trinitas inseparabilis est in substantia, ita inseparabilis est in operibus, quamvis quaedam opera Dei quibusdam personis specialiter conveniant; sicut Patri vox illa, quae de coelo sonuit super Christum baptizatum; et ad Filii personam humanitatis tantummodo pertinet susceptio; et Spiritus sancti personae proprie congruit illa columba, in cuius specie idem Spiritus sanctus descendit super eumdem Filium Dei secundum hominem baptizatum: tamen absque omni dubitatione illam vocem, et illam columbam, et Christi humanitatem tota sancta Trinitas operata est, cuius opera inseparabilia sunt. |
| 69 | Credimus eumdem Filium Dei, Verbum Dei aeternaliter natum de Patre, consubstantialem Patri per omnia, temporaliter natum de Spiritu sancto et Maria semper [Vox semper in aliquibus editis omittitur] virgine, duas habentem nativitates, unam ex Patre aeternam, alteram ex matre temporalem; qui etiam Filius Dei suae carnis conceptione conceptus est, et suae carnis nativitate natus est. Deum vero [Al., verum] confitemur conceptum, et Deum verum natum, eumdem verum Deum et verum hominem, unum Christum, unum Filium Dei unigenitum, proprium et perfectum in duabus naturis, in unius personae singularitate. |
| 70 | Impassibilem et passibilem, mortalem [Ms. SanctGerm., invisibilem et passibiliter mortalem mendose] atque immortalem, crucifixum in infirmitate nostra, eumdemque semper viventem in virtute sua. |
| 71 | Qui mortuus est carnis suae morte, et sepultus; atque ab inferis, damnato et spoliato principe totius iniquitatis, rediens, tertia die resurrexit, atque cum triumpho gloriae videntibus discipulis coelum ascendit, sedens in dextera Patris, id est, maiestate divinitatis. |
| 72 | Inde iam venturus iudicare vivos et mortuos, quem impii videbunt iudicantem in ea forma qua crucifixus est; non in ea humilitate qua iniuste iudicatus est, sed in ea claritate qua iuste iudicaturus est mundum. |
| 73 | Cuius [maiestatis] visio aeterna erit omnium sanctorum beatitudo et gloria. |
| 74 | Gratia, et pax a Deo Patre et Filio eius Iesu Christo Domino nostro sit ista confitenti in omnia saecula saeculorum. |
| 75 | Ex mss. |
| 76 | et edit. |
| 77 | [Explicit liber III de sancta Trinitate, quam excerpsit Alcuinus de libris sancti Augustini.] |