monumenta.ch > Alcuinus > CXCII. Ad aram sanctorum Dionysii et sociorum martyrum. > CCXLV. Ad quemdam episcopum. > Brictii et Christophori. > CCLXXVIII. De gallo fabula. > CCXXXII. Ad eumdem Carolum. > CLIII. De basilicis sanctorum apostolorum sancti Petri. > CCLVII. Ad amicum abeuntem. > CCXXXVII. Allocutio ad Musas in gratiam regalis pueri . > Noe et Abraham . > CLII. Versus Alcuini de ecclesia sancti Liutgeri. > CLXXVII. Ad aram sancti Aniani. > CCXXIV. Pia vota pro urbe Roma et Leone papa . > 14 > CLXXII. Ad templum sanctorum Stephani et Laurentii martyrum. > CLVI. Sancti Iacobi apostoli. > XVII. Ad cruce pendentem. > X. > CCLXXV. Aliud aenigma . > CCXLI. Ad eumdem.
Alcuinus, Carmina, VERSUS AD VARIOS., , CCXL. Ad eumdem Paulinum. <<<     >>> CCXLII. Ad eumdem.

Alcuinus, Carmina, VERSUS AD VARIOS., CCXLI. Ad eumdem.

1 O Pauline Pater, pastor, patriarcha, sacerdos,
Vitae pars melior, nostrae pars inclyta vitae!
Sis memor Albini sacris altaribus astans,
Et dulces inter lacrymas, super ora fluentes,
Dic: Miserere Deus nostro clementer amico,
Criminibusque suis veniam largire benignus,
Ut te cum sanctis liceat laudare per aevum.
2 Omnipotens Patris virtus, sapientia Christus,
Obsecro te supplex toto de pectore pauper;
Ut tua conservet Paulinum dextera semper,
Protegat, atque regat, virtutum floribus ornet.
3 Tuque Maria, Dei Genitrix, sanctissima Virgo,
Prospera cuncta meo Paulino posce, precamur,
Ut vigeat, valeat Christi repletus amore.
4 Vos quoque, chara simul sanctorum turba Tonanti.
5 Qui bibulas proni monitis coelestibus aures,
Ecclesiae Patres, habuistis semper apertas,
Et nunc cum Christo coelestia regna tenetis;
Fundite proque mei Paulini, posco, salute
Cum pietate preces summo super omnia regi.
6 Ut vigeat, valeat Christi praecepta secutus.
7 Et vos Ecclesiae [sanctae] sanctissima proles
In commune precor prostrato corpore terris
[Utque mei curam Paulini habeatis in aevum],
Illius et vitam precibus commendite Christo,
Ut vigeat, valeat longaevo tempore sanus.
8 Angelici faciem coetus qui cernitis almam
Perpetui Patris coelesti in culmine semper,
Expansis manibus humili sed pectore posco,
Vos quoque Paulinum precibus defendite vestris,
Ut gaudens regnet, vestro sociatus honori,
Aeternisque Dei vobiscum laudibus adsit,
Regna beata tenens, felix sine fine, polorum.
9 Hos rogo versiculos habeas, Pater optime, tecum,
Ut tua mens memoret laeto pro carmine natum
Sit tibi Christus amor, virtus, decus, omnia Christus,
Sit via, vita, salus, spes et laus, gloria perpes,
Semper in ore sonet, maneatque in pectore semper,
Ut tibi cum sanctis tribuat coelestia regna:
Qua memor esto tui nati, te posce per illum,
Qui te perpetuam coeli deducat in aulam.
10 Et nunc et semper, mi mi Pauline, valeto.
11 Carminis hic finem lacrymis faciemus obortis
Sed nunquam sacri finem faciemus amoris.
Alcuinus HOME