| 1 | Haec aequata solo viluit domus inclyta quondam, Non tulit hanc speciem, Christi devotus honore Arnonus praesul humilis; renovare iacentem Incipit, et melius totam construxerat aedem; Consecrans summis intercessoribus illam. |
| 2 | Principis egregii primo Michaelis honore, Principis Ecclesiae necnon sub nomine Petri; Principis et fratrum praeclari, et Patris Amandi; Ut sanctum, voluit, polyandrum fratribus esset. |
| 3 | Vos in pace Dei chari requiescite, fratres, Donec ab aetheria clamet pius angelus arce: Surgite nunc prompti terrae de pulvere, fratres: Vos vocat adveniens iudex de culmine coeli: Cum meritis animas propriis assumite vestras: Ante Dei Christi magnum modo state tribunal, Ut condigna suis capiat quis praemia factis. |
| 4 | Vosque timete diem horis, precor, omnibus illum, Qui legitis versus operis, dum tempus habetis, Ut vos inveniat veniens lux illa paratos. |
| 5 | Atque mei memores, supplex rogo, semper in ore Dicite: Christe tuo famulo pius esto per aevum. |
| 6 | Alcuin dicor ego, iam vos sine fine valete. |