| 1 | Non, rogo, dura tibi videatur semita fratrum, Haec te currentem ducit ad ecclesiam. |
| 2 | Non hic turba sonat populi, non forte tumultus; Vos inter nullus hic alienus eat. |
| 3 | Haec via vos pariter concordi pectore ducat, Laudibus intentos ad pia laude Dei. |
| 4 | Unus amor Christus nobis fiat, atque iter unum, Ille est certa salus, spes, decus et charitas. |
| 5 | Non tu somnigere vadas torpore per istum, Sed laus alma Dei semper in ore sonet. |
| 6 | Angelus ut tecum coelesti currat ab arce, Dum videat laudes te resonare Dei. |
| 7 | Te quoque consociat sanctorum pectore laeto, Gaudentem Christi coetus in ecclesia, Relliquiae quorum multae conduntur in illa, Haec superans munus mille talenta pium. |
| 8 | Spesque, fidesque simul pariter quapropter, in istis Porticibus, tecum certa salutis erat. |
| 9 | Quot tu nam currens pedibus vestigia ponis, Totam mercedem frater habere vales. |
| 10 | Non idcirco tibi videatur haec via longa, Per hanc coelorum pervia porta patet. |
| 11 | Felix quippe dies tibi, qua te suscipit illa, Illic cum Christo regna beata tenes. |
| 12 | Currite vos iuvenes Christi properanter in aulam, Ad laudem Christi currite, vos iuvenes. |
| 13 | Unanimesque simul regem laudate supernum, Semper amate Deum unanimesque simul. |
| 14 | Si nequeas pedibus senior, rogo, pectore curre, Mente polum scande, si nequeas pedibus. |