| 1 | Res est mira quidem, vult quam tibi dicere vates: Letheus iuvenum percussit tempora ramus, Ut hospes clauso patuisset limine templi: Quisque potest caeco melius hunc cernere visu, Sensibus et sopitis melius proferre loquelas, Ignotas siquidem varias et fingere formas. |
| 2 | Cernitur, auditur, fuerat qui tempore nullo: Noctibus hunc, iuvenis, toto tibi corde caveto. |
| 3 | Subruit hic sensus, binos et claudit ocellos Splendida stelligeri videas ne lumina coeli. |
| 4 | Aut tua iam voces doctoris hauriat auris, Vel pes ecclesiam nocturno tempore currat. |
| 5 | Huius, quaeso, caput valido percutere pugno, Ne tibi cernentes hospes excaecet ocellos, Aut torpore malo sensus tibi subruat omnes; Sed tibi collyrium visus infunde salutis: Ut valeas signi voces audire sonantis Quod te quippe vocat, laudes cantare Tonantis. |
| 6 | Consere quippe manus, modico dormire memento, Neve repente tibi veniat praefortis egestas, Ut monet egregio Salomon sermone legentes. |