| 1 | Considerandum est diligentius, et omnis pietatis intellectu percipiendum, quod ille mirabilis evangelista ait: Verbum caro factum est, id est, Deus homo factus est. Ex carnis itaque nomine totum hominem significans, ut in eo loco intelligitur: Videbit omnis caro salutare Dei (Luc. III, 6), id est, (0242A) omnis homo; non ut divinitatis natura verteretur in humanitatem; sed salva maiestate divina, assumpta est humanitas: non diminuta est divinitas, sed honorificata humanitas, manente proprietate naturae humanae, ut idem ipse, qui ex Deo Patre aeternaliter natus est, ex matre Virgine temporaliter natus esset: ut sit verum quod tantus Evangelista ait: Verbum caro factum est. Si Deus homo factus est, utique homo Deus factus est, propter unitatem personae, ut sit ex omni parte veritas in Christo Iesu Domino nostro. Si igitur homo, qui assumptus est a Verbo Dei, Deus est nuncupativus, quia alia natura est humanitatis, alia divinitatis; consequens videtur, ut Deus, qui hominem assumpsit, homo sit nuncupativus, et non potest stare, quod evangelista ait: (0242B) Verbum caro factum est. Similiter intelligendum est versa vice de adoptione: si ideo ille homo, qui assumptus est, adoptivus est filius Deo, quia alia natura est humanitatis, alia divinitatis, sequitur illa necessaria conversio, ut Deus, qui ex Virgine natus est, sit adoptivus Deus, et non sit beata Virgo, secundum Nestorianam impietatem, vera Genitrix Dei, sed per quamdam, si fieri possit, adoptionem mater Dei. Quod quam [Cod. Vat., quantum] nefandum sit, et quam impium, et ab omni veritate alienum, quisquis pie de Christo sentit, agnoscit. |
| 2 | Has vero novitates vocum, charissimi et clarissimae dignitatis viri, omnino abiicite, et consentanea evangelicis 868 paginis et apostolicis traditionibus credite et praedicate; intelligentes alia nomina in Christo Deo (0242C) propria esse, alia significativa: et discernite quid cui [Cod. Paris., quid cuique] rei conveniat. |
| 4 | Significativa nomina sunt propter quasdam actiones, quae completae sunt in illo, leo, lapis, ovis, vitulus, vermis, et talia plurima, quae ratione discernenda sunt. |