[3] Et, ut verba Scripturae transsumam, cantabantur eorum turpitudines in triviis Geth, et in compitis Ascalonis . Frequenter eis ad memoriam reducebam illud Osee: Si fornicaris tu, Israel, non delinquat saltem Iuda . Ipsi vero publice et aperte fornicantes praedicabant sicut Sodoma peccatum suum, et in palpebris popularis infamiae ducebant uxores, alter alterius filiam, sive neptem; tantaque erat cognationis connexio inter eos, ut colligationes impietatis eorum nemo dissolvere praevaleret.