[3] Ego etiam tua semper infortunia mea feci, atque inter casuales eventus sortem meam tuo statui amica vicissitudine te communicatione gratissima coaptavi. Dicis te sanctioris vitae propositum ideo specialiter elegisse, ut huius saeculi tentationes evaderes; nunc autem lamentabili conquestione deploras, te in ipso religionis ingressu longe miserius quam prius tentationibus circumseptum, tuamque carnem ex ipsa sui servitute legi spirituali contumacius repugnare.