Caput 5 1 Anno ab urbe condita DCCXC tertius ab Augusto Gaius Caligula regnare coepit mansitque in imperio annis non plenis quattuor, homo omnium ante se flagitiosissimus et qui vere dignus Romanis blasphemantibus et Iudaeis persecutoribus punitor adhibitus videretur.
2 hic, ut breviter magnitudinem crudelitatis eius expromam, exclamasse fertur: utinam populus Romanus unam cervicem haberet. saepe etiam de condicione temporum suorum conquestus est, quod nullis calamitatibus publicis insignirentur.
3 O beata germina temporis Christiani, quantum praevaluistis in rebus humanis, ut etiam crudelitas hominis magis potuerit clades desiderare quam invenire! ecce de tranquillitate generali feritas ieiuna conqueritur;
furor impius intus Saeva sedens super arma et centum vinctus aenis Post tergum nodis fremit horridus ore cruento.
4 servi rebelles et fugitivi gladiatores perterruere Romam, evertere Italiam, Siciliam deleverunt, iam paene universo humano generi toto orbe metuendi; in diebus autem salutis, hoc est temporibus Christianis, convellere quietem non potest vel Caesar infestus. 5 hic siquidem magno et incredibili apparatu profectus quaerere hostem viribus otiosis, Germaniam Galliamque percurrens, in ora Oceani circa prospectum Britanniae restitit. cumque ibi Minocynobelinum Britannorum regis filium, qui a patre pulsus cum paucis oberrabat, in deditionem recepisset, deficiente belli materia Romam rediit.
6 isdem autem diebus Iudaei, qui iam tunc ob passionem Christi meritis ubique cladibus exagitabantur, apud Alexandriam seditione excitata, profligati caede atque urbe propulsi, expromendarum querellarum causa Philonem quendam, virum sane in primis eruditum, legatum ad Caesarem miserant.
7 sed Caligula cum omnibus hominibus tum praecipue Iudaeis infestissimus, spreta legatione Philonis omnes Iudaeorum sacras sedes atque in primis antiquum illud in Hierosolymis sacrarium profanari sacrificiis gentilium ac repleri statuis simulacrisque imperavit seque ibi ut deum coli praecepit.
8 Pilatus autem praeses, qui sententiam damnationis in Christum dixerat, postquam plurimas seditiones in Hierosolymis excepit ac fecit, tantis inrogante Gaio angoribus coartatus est, ut sua se transverberans manu malorum conpendium mortis celeritate quaesierit.
9 Gaius Caligula libidinibus suis etiam illud sceleris adiecit, ut sorores suas primum stupro pollueret, deinde exilio damnaret. qui post omnes simul exules iussit occidi. ipse autem a suis protectoribus occisus est.
10 duo libelli in secretis eius reperti sunt, quorum alteri pugio, alteri gladius pro signo nominis adscriptum erat: ambo lectissimorum virorum utriusque ordinis, senatorii et equestris, nomina et notas continebant morti destinatorum. inventa est et arca ingens variorum venenorum, quibus mox Claudio Caesare iubente demersis infecta maria traduntur non sine magno piscium exitio, quos enecatos per proxima litora passim aestus eiecit.
11 Magnum revera indicium miserentis Dei propter suffragium gratiae in populum continuo ex parte crediturum et propter irae temperamentum in populum tunc infideliter obstinatum, ut quanta multitudo hominum praeparatam mortem evaserit, ex multitudine interfectorum piscium disceretur omnibusque notesceret, quid tanta veneni moles arte aucta agere in misera civitate potuisset, quae neglegenter effusa etiam maria corrupit.