Orosius, VII
Edition: Karl Zangemeister, 1882
Caput 13
1 Anno ab urbe condita DCCCLXVII Hadrianus, consobrinae Traiani filius, duodecimus ab Augusto principatum adeptus, uno et viginti annis imperavit.
2 hic per Quadratum discipulum apostolorum et Aristidem Atheniensem, virum fide sapientiaque plenum, et per Serenum Granium legatum libris de Christiana religione conpositis instructus atque eruditus, praecepit per epistulam ad Minucium Fundanum proconsule Asiae datam, ut nemini liceret Christianos sine obiectu criminis aut probatione damnare;
3 idemque continuo pater patriae in senatu ultra morem maiorum appellatur et uxor eius Augusta. Hadrianus rempublicam iustissimis legibus ordinavit; bellum contra Sauromatas gessit et vicit.
4 Iudaeos sane, perturbatione scelerum suorum exagitatos et Palaestinam provinciam quondam suam depopulantes, ultima caede perdomuit, ultusque est Christianos, quos illi Cocheba duce, cur sibi adversum Romanos non adsentarentur, excruciabant;
5 praecepitque, ne cui Iudaeo introeundi Hierosolymam esset licentia, Christianis tantum civitate permissa: quam ipse in optimum statum murorum exstructione reparavit et Aeliam vocari de praenomine suo praecepit.