Orosius, III
Edition: Karl Zangemeister, 1882
Caput 5
1 Sequitur hanc miseram luem miserioremque eius expiationem proximo anno satis triste prodigium. repente siquidem medio urbis terra dissiluit, vastoque praeruptu hiantia subito inferna patuerunt.
2 manebat diu ad spectaculum terroremque cunctorum patenti voragine inpudens specus nefariamque vivi hominis sepulturam diis interpretibus expetebat.
3 satisfecit inprobis faucibus praecipitio sui M. Curtius, vir eques armatus, iniecitque crudeli terrae inopimam satietatem, cui parum esset, quod ex tanta pestilentia mortuos per sepulchra susciperet, nisi etiam vivos scissa sorberet.