Orosius, III
Edition: Karl Zangemeister, 1882
Caput 3
1 Anno ab urbe condita CCCLXXVI saevissimo terrae motu Achaia universa concussa est et duae tunc civitates, id est Ebora et Helice, abruptis locorum hiatibus devoratae.
2 At ego nunc e contrario poteram similia in diebus nostris apud Constantinopolim, aeque modo principem gentium, praedicta et facta sed non perfecta narrare, cum post terribilem denuntiationem conscientiamque mali sui praesciam subter commota funditus terra tremeret et desuper fusa caelitus flamma penderet, donec orationibus Arcadii principis et populi Christiani praesentem perditionem Deus exoratus averteret,
3 probans se solum esse et conservatorem humilium et punitorem malorum. sed haec ut commemorata sint magis quam explicita verecundiae concesserim ut et qui scit recolat et qui nescit inquirat.
4 Interea Romani, qui per septuaginta annos ab urbe Vulscorum, praeterea Faliscorum Aequorum et Sutrinorum subacti et adtriti adsiduis bellis conficiebantur, tandem in supra scriptis diebus Camillo duce easdem cepere civitates et redivivo finem dedere certamini.
5 Praenestinos etiam eodem tempore, qui usque ad portam Romae bellando et caedendo pervenerant, ad flumen Haliam T. Quintio pugnante vicerunt.